Gjyqtarët nuk tërhiqen, bojkotojnë takimin me Ramën

Unioni i Gjyqtarëve të Shqipërisë nuk do të marrë pjesë në tryezën e konsultimit të thirrur nga kryeministri Edi Rama për diskutimin e pagave të magjistratëve. Takimi është planifikuar të zhvillohet sot në orën 12:30, në një kohë kur përplasjet institucionale për nivelin e pagave të gjyqtarëve dhe prokurorëve janë ende të hapura.

Vendimi për të mos marrë pjesë është bërë publik përmes një deklarate të Bordit Drejtues të UGJSH-së. Në qëndrimin e saj, organizata sqaron se e konsideron dialogun institucional një instrument të rëndësishëm për adresimin e çështjeve me interes për sistemin e drejtësisë, por në rastin konkret vlerëson se konsultimi duhet të presë përfundimin e shqyrtimit nga Gjykata Kushtetuese.

Sipas Unionit, çështja e pagave të magjistratëve ndodhet aktualisht përpara Gjykatës Kushtetuese, pas padisë së depozituar për ndryshimet e fundit ligjore. Për këtë arsye, UGJSH argumenton se çdo diskutim institucional mbi këtë çështje duhet të zhvillohet pasi të jetë qartësuar më parë situata juridike.

Në qëndrimin e tyre, gjyqtarët kërkojnë zbatimin e vendimit të Gjykatës Kushtetuese, i cili, sipas tyre, përcakton standardin minimal të pagës dhe një mekanizëm të qëndrueshëm për përcaktimin e saj në të ardhmen.

“UGJSH e konsideron të nevojshme ruajtjen e pacenuar të kufijve të juridiksionit kushtetues të kësaj Gjykate, parimet që garantojnë objektivitetin e paanshmërinë e saj, si dhe parimet që garantojnë funksionimin e një shteti të së drejtës”, thuhet në deklaratën e Bordit Drejtues.

Unioni i Gjyqtarëve sqaron se refuzimi i ftesës nuk duhet të interpretohet si një ndërprerje e dialogut me institucionet. Përkundrazi, UGJSH shprehet se mbetet e hapur për komunikimin institucional, por e lidh vijimin e këtij dialogu me nevojën për të pasur fillimisht një qartësim nga Gjykata Kushtetuese mbi çështjen e pagave.

Tryeza e thirrur nga kryeministri Edi Rama vjen në një moment kur përcaktimi i pagave të magjistratëve është kthyer në një çështje të debatueshme mes institucioneve të drejtësisë dhe ekzekutivit.