Goditet rrjeti i lojërave të fatit në Lezhë, 3 në pranga, 1 në kërkim

Një operacion i gjerë policor ka çuar në goditjen e disa rasteve të organizimit të paligjshëm të lojërave të fatit në qarkun e Lezhës, duke zbuluar njëkohësisht edhe aktivitet të dyshuar kriminal me lëndë narkotike.

Aksioni, i koduar “Rastet”, u zhvillua nga Policia e Shtetit pas informacioneve të siguruara nga strukturat qendrore. Si rezultat, u identifikuan tre ambiente në zonat e Milotit dhe Laçit, të përshtatura për zhvillimin e lojërave të fatit me makineta dhe tavolina pokeri.

Gjatë kontrolleve, në njërin prej ambienteve në Laç, përveç pajisjeve të lojërave të fatit, u konstatuan edhe doza të një lënde të dyshuar si kokainë, çka shton dyshimet për përfshirje në aktivitet të shpërndarjes së narkotikëve.

Në total, autoritetet sekuestruan 15 makineta, 3 tavolina pokeri, një sasi lënde narkotike, para cash dhe pajisje të tjera që shërbenin për këtë veprimtari të paligjshme.

Në pranga ranë tre persona të identifikuar si Shkëlzen Preni, Dorjan Medha dhe Ylli Veseli, të dyshuar si pronarë apo administratorë të ambienteve. Një tjetër shtetas është proceduar penalisht, ndërsa Pjetër Lleshi është shpallur në kërkim dhe vijon puna për kapjen e tij.

Sipas njoftimit zyrtar, një nga rastet lidhet me një lokal në Laç, ku u gjetën disa pajisje për lojëra fati dhe lëndë narkotike e ndarë në doza. Dyshohet se ambienti administrohej në bashkëpunim nga disa prej të arrestuarve. Ndërkohë, në Milot u evidentuan dy ambiente të tjera ku zhvilloheshin aktivitete të paligjshme me lojëra fati.

Operacioni “Rastet” është pjesë e kontrolleve të vazhdueshme që synojnë goditjen e kësaj paligjshmërie në territor, ndërsa autoritetet bëjnë me dije se aksione të tilla do të vijojnë edhe në zona të tjera.

Materialet procedurale i janë referuar Prokurorisë së Lezhës për vijimin e hetimeve dhe ndjekjen ligjore të personave të përfshirë.

NJOFTIMI I POLICISE

Policia e Shtetit/Finalizohet operacioni i koduar “Rastet”.

Operacioni u zhvillua pas informacionit të siguruar nga Drejtoria e Përgjithshme e Policisë së Shtetit. Zbulohen në Milot dhe në Laç, 3 raste ku kishin përshtatur ambientet për lojëra fati me makineta dhe tavolina pokeri.

Njëri prej ambienteve, gjithashtu i përshtatur për përdorim dhe shitje të lëndëve narkotike. Sekuestrohen 15 makineta, 3 tavolina për lojën “Poker”, sasi lënde narkotike Kokainë, shumë parash, si dhe sende të tjera që i shërbenin kësaj veprimtarie të kundërligjshme.

Arrestohen 3 shtetas, procedohet penalisht 1 shtetas dhe shpallet në kërkim 1 (pronarë dhe/ose administratorë të ambienteve).

Bazuar në informacionet e siguruara nga Drejtoria e Përgjithshme e Policisë së Shtetit, për disa raste ku ishin përshtatur ambientet për zhvillimin e lojërave të fatit, me makineta dhe tavolina pokeri, shërbimet e Policisë organizuan dhe finalizuan operacionin e koduar “Rastet”. Gjatë operacionit u zbuluan 3 ambiente të përshtatura për organizim të kundërligjshëm të lojërave të fatit, dhe u konstatua se te njëri prej tyre gjithashtu përdoreshin dhe shiteshin lëndë narkotike. Konkretisht, për këto raste:

-u arrestuan shtetasit Sh. P., 21 vjeç dhe D. M., 33 vjeç, dhe u procedua penalisht shtetasi S. Sh., 61 vjeç, pasi në një lokal në Laç, në pronësi të shtetasit të proceduar, subjekt i cili dyshohet se bashkadministrohej nga 2 të arrestuarit, u gjetën 8 makineta, 2 tavolina dhe sende të tjera për lojëra fati, si dhe sasi lëndë e dyshuar narkotike Kokainë, e ndarë në doza;

-u arrestua shtetasi Y. V., 45 vjeç, pasi në lokalin e tij, në Milot, u gjetën 6 pajisje dhe sende me të cilat luheshin lojëra fati;

-u shpall në kërkim shtetasi P. Ll., 31 vjeç, pasi në një ambient në pronësi të tij, në Milot, u gjetën 2 makineta, 1 tavolinë dhe sende për lojëra fati. Punohet për kapjen e 31-vjeçarit.

Kontrollet kundër kësaj paligjshmërie, vijojnë në subjekte dhe në ambiente të ndryshme.

Materialet procedurale iu referuan Prokurorisë së Lezhës, për veprime të mëtejshme.