Goli në minutën e 94-t rikthen Kaljarin e Ranierit në Serinë A

Finalja e mbijetesës, zbulohet skuadra e fundit që bie në Serie B

Finalja e mbijetesës mes Specias dhe Veronës, e zhvilluar në stadiumin “Mapei” të Sasuolos, është mbyllur me triumfin 1-3 të veronezëve, që kanë festuar kështu qëndrimin në Serinë A, ndërkohë që nuk ia ka dalë Specia, që sezonin e ardhshëm do të militojë në Serinë B.  

Kujtojmë që të dyja skuadrat e mbyllën kampionatin me pikë të barabarta, teksa me rregullin e ri të vendosur në Serinë A, do të duhej një ndeshje shtesë mes tyre, për të përcaktuar verdiktet e sezonit dhe në fund ishte skuadra e trajnerit Zafaroni, ajo që ia doli të përmbushte misionin. 

Për sa i përket duelit të sotëm, Faraoni ishte ai që hapi serinë e golave në minutën e pestë, duke kaluar në avantazh Veronën, ndërkohë që në minutën e 15-të, Ampadu vendosi baraspeshën për Specian. Po në pjesën e parë do të shënoheshin edhe dy gola të tjera për Veronën që mbajnë firmën e Ngonge në minutat 26 dhe 38.

Pjesa e dytë nuk solli gola, por në minutën e 68-të, Specia kishte shansin e artë për të rihapur këtë finale, teksa Faraoni u ndëshkua me karton të kuq, ndërkohë që Nzola shpërdoroi një 11-metërsh, duke “vulosur” kështu zhgënjimin e skuadrës së tij dhe rënien në Serinë B.  

Finalja e “Play-Off”-it mes Barit dhe Kaljarit regjistroi një fund dramatik, teksa një gol i shënuar nga sulmuesi Pavoleti në minutën 90+4, i mundësoi një biletë rikthimi në Serinë A skuadrës së Kaljarit që drejtohet nga Klaudio Ranieri.

Akti i parë i kësaj finaleje kishte përfunduar me rezultatin 1-1, ndërkohë që në ndeshjen e kthimit, vendasve të Barit do iu mjaftonte dhe një barazim, për t’u ngjitur në Serinë A, për shkak se në fund të sezonit u renditën më lartë se Kaljari në renditje. 

Por fati duket se nuk ishte me barezët, pasi goli në minutën e 94-t shtangu të gjithë të pranishmit, duke bërë që në kampin mik të shpërthente festa, teksa Kaljari rikthehet kështu në Serinë A, për një sezoni mungesë. Meritë absolute për këtë sukses ka padyshim “arkitekti” Klaudio Ranieri.