“Hap gojën sa të duash”, si reklamohej “buka” në bisedat e grupit

Nga dosja voluminoze e SPAK, që çoi në prangosjen e një rrjeti që trafikonte kokainë nga Amerika Latine drejt Italisë, janë zbuluar detaje të tjera mbi mënyrën se si organizohej tregtia e drogës, e cila përfshinte rreth 1.3 ton kokainë.

Ndër të arrestuarit ishte edhe oficeri i Antiterrorit, Igli Haxhiaj, i cili u la ditën e sotme në burg nga GJKKO. Ai akuzohet se ka komunikuar informacione të klasifikuara ndaj personave që ishin objekt i këtij hetimi, në këmbim të përfitimeve financiare.

Në dosjen e bërë publike pasqyrohen edhe bisedat e zhvilluara në platformën SkyECC mes Haxhiajt dhe kontakteve të tij. Disa prej fragmenteve të identifikuara në hetim paraqiten më poshtë.

Biseda – 08.03.2021

I. Haxhiaj: Vëlla, si po ecën puna andej… Ke ndonjë mall të mirë me ndonjë çmim të favorshëm?

Tjetri: Eci si zakonisht, duke u munduar të bëjmë lekë. Kam diçka nga Hollanda, rreth 29. Ma ofruan ditët e fundit, është origjinal… Për të përzier kam plot me 25, po nëse të duhen me luspa me gjithçka, i kam.

Haxhiaj: Po qenkan shtrenjt… por po e shitet me aq, e kuptoj.

Biseda – 08.02.2021

Tjetri: Kjo është, s’di sa kanë ngelur. Me 28 të jap ty… Më thuaj, të jap një për testim. Me këta punojmë dorazi.

Haxhiaj: E kuptoj… Po çmimi? Është e mirë? Edhe unë dua punë me lek në dorë. Pa lek s’punoj dot. Sa për cilësinë, di gjë?

Tjetri: Merreni një copë për provë dhe vendosni vetë. Do pyes edhe për gjendjen.

Biseda – 01.03.2021

Tjetri: Kam një copë në Athinë, ta dërgoj? Me çfarë ta sjell?

Haxhiaj: Duhet të flas njëherë… Pml është ajo?

Tjetri: Ajo ngarkesë është… Pml, body, rolex… s’e di fiks, por aty rrotullohet.

Tjetri: 29 mijë blerja, 2 mijë transporti… 31 gjithsej, ne e marrim me 30.

Biseda – 22.10.2020

Tjetri dërgon disa foto.

Haxhiaj: O boso, çfarë është kjo? Bukur duket.

Tjetri: Ky mall këtu shitet me 38.

Haxhiaj: Po me 37 mund ta marrim?

Tjetri: Me 37 e marrim ne… Nëse merret edhe ai tjetri, po i jap dy copa.

Haxhiaj: Merre dy gram, jam duke pritur edhe këtë me 37 që ta provoj se mund të më duhen dy copë.

Tjetri: Në Durrës janë këto, kanë tre lloj stampash.

Haxhiaj: I ke testuar? M’i ço pak që të ruaj… Je i sigurt?

Tjetri: Jam duke vozitur, t’i çoj më vonë. S’e kam provuar, por më kanë thënë që është i mirë.

12.02.2021

Haxhiaj dërgon disa foto të tjera të llojit “krahasues”.

Tjetri: Ja i nisa, po pres përgjigje. Pyet njëherë mos është e larë…

Haxhiaj: Këto që të çova janë 100% originale, colo.

Tjetri: Nga ç’vend janë?

Haxhiaj: Rotterdam, besoj. Po e pyes shokun tjetër për saktësi.

Biseda – 14.12.2020

Tjetri: Sa është çmimi në Hollandë? Pyete njëherë sa për informacion.

Haxhiaj: Mirë, po pyes… Në Barcelonë sa shitet kjo? Në Hollandë këta djemtë e kanë marrë nga 31.5 deri në 32.5.

Tjetri: Në Barcelonë rreth 29.5–30.

Haxhiaj: Ka shumë aty?

Tjetri: Rreth 500. Por mbase merret sasi më e madhe në Hollandë, se aty e nxjerrim më mirë.

Biseda – 15.12.2020

Tjetri: File, Hollandë – 29.5. Është malli ynë.

Haxhiaj: Po flas me djalin direkt, sasia është e madhe?

Tjetri: Jo shumë… por “hap gojën sa të duash”.

Haxhiaj: Në Barcelonë kush është kontakti? Do ta shohë dikush. Edhe sa na e lë… Më jep një adresë…

Haxhiaj: Po nëse mi sjell 4–5 copa më poshtë? Ka mundësi t’i sjellësh në Shqipëri?

Tjetri: Unë jo. Unë t’i jap në Hollandë ose Spanjë. Pastaj shikoje vetë.

Ndaj Haxhiajt rëndojnë akuzat për korrupsion, shpërdorim detyre dhe nxjerrje të sekretit hetimor. Tre të arrestuar të tjerë – Asti Llupi, Altin Shehaj dhe Erald Salla – janë ndaluar me qëllim ekstradimin në Itali.

Gjykata e Brescias ka firmosur 24 masa sigurie, 10 prej të cilave u ekzekutuan në Itali, 3 në Shqipëri, ndërsa tre anëtarë të tjerë dyshohet se fshihen ende në vend.

Sipas hetimit, kokaina transportohej fillimisht me anije nga Amerika e Jugut drejt Europës Veriore dhe më pas shpërndahej me mjete tokësore drejt 6 bazave në Itali të kontrolluara nga grupi shqiptar.