Hua 10 mijë euro nga kunati, kërkohet shkarkimi i gjyqtarit Asrtit Faqolli që kaloi Vetingun

Vetingu për gjyqtarin e Gjykatës së Tiranës, Astrit Faqollin, i cili kaloi me sukses kontrollin e Komisionit të Pavarur të Kualifikimit, nisi sërish në Kolegjin e Posaçëm të Apelimit.

Astrit Faqolli

Gjatë ditës së djeshme u zhvillua seanca e parë për shqyrtimin e ankimit të Komisionerit Publik, në lidhje me konfirmimin e gjyqtarit Faqolli. Ndërkohë që komisioneri Florian Ballhysa, në fund të parashtrimeve të tij kërkoi shkarkimin nga detyra të Faqollit, ky i fundit argumentoi se vendimi i KPK-së ishte korrekt dhe duhet të lihej në fuqi, ndërsa dorëzoi disa prova të reja.

Sipas KP-së, në vendimin e konfirmimit Komisioni është mbështetur në arsyetime dhe qëndrime jo të sakta, lidhur me kuptimin dhe zbatimin e ligjit. Ankimimi i Komisionerit ka të bëjë vetëm me kriterin e pasurisë, për të cilin pretendon se nuk ka arritur nivelin e besueshëm. Së pari, sipas KP-së Faqolli nuk arrin të mbulojë me të ardhura të ligjshme blerjen e një apartamenti në Tiranë, si dhe nuk justifikon burimet e deklaruara.

Si burim të krijimit ka deklaruar një shumë të marrë hua nga kunati, në vlerën e 10 mijë eurove dhe sipas KPsë, kunati nuk ka pasur të ardhura. Gjithashtu, Ballhysa thotë se gjyqtari nuk arrin të mbulojë me të ardhura të ligjshme kursimet e deklaruara. Referuar vendimit të Komisionit, gjyqtari ka deklaruar se kursimi prej 5.000.000 lekësh ka burim kryesor të ardhurat nga aktiviteti privat i bashkëshortes.

Edhe për kursimet e deklaruara në vitet 2004-2005, gjyqtari nuk arrin t’i justifikojë. Me probleme, sipas Komisionerit, rezulton edhe shitja e një makine të deklaruar si burim për këtë pasuri. Në fund, komisioneri Ballhysa u shpreh se Faqolli nuk mbulon me të ardhura të ligjshme blerjen e apartamentit për një shumë totale prej rreth 2.4 milionë lekësh. Së dyti, probleme sipas Ballhysës, janë konstatuar edhe në pasurinë shtëpi 3-katëshe në Librazhd.

Komisioneri tha se gjyqtari ka bërë deklarim të pamjaftueshëm. Po ashtu, të dyja burimet e deklaruara për krijimin e të ardhurave në vlerën prej 2.983,619 lekësh, që kanë shërbyer për fitimin e pronësisë së pasurisë së paluajtshme, nuk mbulohen me të ardhura të ligjshme.