‘I doli’ emri në SPAK, a do e tregojë ‘forcën’ sot Bela?

Mesa duket, “ylli” i qeverisë nuk po ndriçon më vetëm në kantieret e tenderave publikë. Belinda Balluku, zëvendëskryeministrja dhe ministrja e Infrastrukturës, i është shtuar listës së zyrtarëve të lartë që SPAK ka futur nën lupë, për shkelje të barazisë në tendera.

Sot, “Bela” është ftuar në Prokurorinë e Posaçme, e shoqëruar, siç e kërkon zakoni i rasteve serioze, nga avokati mbrojtës. Ftesa mban firmën e prokurorit Dritan Prençi, dhe fakti që kërkohet prania e avokatit nuk është për kafe miqësore, por zakonisht sinjalizon komunikim zyrtar të akuzës penale.

Tashmë pritet të shihet nëse zëvendëskryeministrja do të shfaqet vetë në SPAK apo do ta ndjekë “nga larg” këtë episod, duke u mbështetur te stili i zakonshëm i heshtjes qeveritare.

Balluku, që prej korrikut 2022 mban postin e zëvendëskryeministres dhe prej vitit 2019 atë të ministres së Infrastrukturës e Energjisë, duket se do të ketë përballë një “kantier” tjetër, atë të drejtësisë.

E mbetet për t’u parë nëse “forca” që ka përmendur shpesh në publik do t’i duhet sot në korridoret e SPAK-ut.