I moshuari ‘kërcënon’ me bastun në Këshillin Bashkiak të Maliqit

Mbledhja e Këshillit Bashkiak të Maliqit, e zhvilluar paraditen e kësaj të enjteje, është shoqëruar me debate dhe tensione mes këshilltarëve, ndërsa përfaqësuesit e majtë vendosën të largohen nga salla.

Mbledhja ishte thirrur nga opozita dhe nisi rreth orës 10:00, por zgjati vetëm rreth 20 minuta. Në qendër të diskutimeve ishte Reforma Territoriale dhe qëndrimi që Këshilli Bashkiak i Maliqit duhet t’i përcjellë Kuvendit lidhur me rishikimin e ndarjes administrativo-territoriale.

Në rendin e ditës ishte përfshirë miratimi i qëndrimit zyrtar të Këshillit Bashkiak, i cili më pas do t’i dërgohej Parlamentit si pjesë e procesit të rishikimit të hartës territoriale të vendit.

Të majtët nuk pranojnë të marrin vendim

Gjatë mbledhjes, grupi i këshilltarëve të majtë deklaroi se nuk do të merrte pjesë në një vendimmarrje për propozimin që do t’i përcillet Kuvendit.

Situata u tensionua më tej pas përfundimit të diskutimeve, kur kryetari i Këshillit Bashkiak njoftoi mbylljen e mbledhjes.

Vendimi shkaktoi reagime nga këshilltarët e opozitës dhe qytetarët që ndodheshin në sallë, duke e kthyer mbledhjen në një përplasje të fortë verbale.

I moshuari përplaset me të pranishmit: “Ulu atje!”

Mes tensioneve të krijuara në sallë, një prej qytetarëve të pranishëm u shfaq i revoltuar për mbylljen e mbledhjes.

Në pamjet e publikuara nga mbledhja, i moshuari shihet teksa i drejtohet njërit prej personave të pranishëm, duke përdorur edhe bastunin e tij në momentin e përplasjes.

“Kush e mbyll mbledhjen? Ulu atje. Ulu shpejt”, dëgjohet të thotë ai.

Maliqi drejt bashkimit me Korçën?

Përplasja në Këshillin Bashkiak zhvillohet në një kohë kur vijon diskutimi për ndryshimet e propozuara në kuadër të Reformës Territoriale.

Sipas draftit të propozuar nga socialistët, Bashkia e Maliqit parashikohet të bashkohet me Bashkinë e Korçës.

Ky propozim ka hapur diskutime në nivel vendor, ndërsa këshillat bashkiakë pritet të shprehin qëndrimet e tyre në kuadër të procesit që synon rishikimin e ndarjes administrativo-territoriale të Shqipërisë.