I riu me “Shtëpi bari” në Tiranë, arrestohet

Policia ka dhënë detaje të reja lidhur me arrestimin e të riut në Tiranë, i cili kishte përshtatur banesën për kultivimin e kanabisit.

Operacioni është zhvilluar në rrugën “Sotir Caci” në kryeqytet, ku 32-vjeçari Ermir Nasi kishte marrë një banesë me qira.

Ai e kishte përshtatur shtëpinë për mbjelljen dhe kultivimin e kanabisit. Në momentin që ka hyrë policia në banesë, i riu ka tentuar të largohet duke u hedhur nga kati i tretë.

Nga kontrollet e ushtruara, u gjetën 81 vazo me kanabis, llamba dhe pajisje të tjera që përdoreshin për kultivimin e bimëve narkotike.

Gjithashtu, është zbuluar dhe një lidhje e paligjshme e energjisë elektrike.

Njoftimi i policisë:

Finalizohet operacioni policor i koduar “Lugano 2”, për goditjen e veprimtarisë kriminale në fushën e kultivimit të bimëve narkotike me anë të llambave. Operacioni i zhvilluar nga Komisariati i Policisë Nr. 4 në bashkëpunim me OSHEE. Gjatë operacionit është zbuluar një ambient i përshtatur për kultivimin e kanabisit, me anë të llambave, në një banesë ku kishte lidhje të paligjshme elektrike.

Vihet në pranga 1 shtetas, sekuestrohen pajisje për kultivimin e kanabisit, llamba dhe bimë narkotike.

Në vijim të punës për parandalimin, evidentimin dhe goditjen e veprimtarisë kriminale në fushën e narkotikëve, shërbimet e Komisariatit të Policisë Nr. 4, pas në pune të mirëfilltë hetimore, bazuar dhe në informacionet e marra në rrugë operative se një shtetas, në rrugën “Sotir Caci”, kishte përshtatur banesën e marrë me qira, për kultivim të bimëve narkotike, organizuan dhe finalizuan me sukses operacionin policor të koduar “Lugano 2”.

Në kuadër të këtij operacioni u arrestua në flagrancë shtetasi  E. N., 32 vjeç, për veprën penale “Kultivimi i bimëve narkotike”.

Ky shtetas, gjatë ndërhyrjes nga shërbimet e Policisë, ka tentuar të largohet nga banesa të cilën kishte përshtatur për kultivimin e bimëve narkotike me anë të llambave, duke u hedhur nga kati i tretë. Gjatë kontrollit të kësaj banese, në rrugën “Sotir Caci”, janë gjetur dhe sekuestruar pajisje që shërbenin për kultivimin e bimëve narkotike, llamba dhe  81 vazo me bimë të dyshuara narkotike cannabis sativa.

Materialet procedurale iu referuan Prokurorisë pranë Gjykatës së Shkallës së Parë Tiranë, për veprën penale “Kultivimi i bimëve narkotike”.