I vunë tritol lokalit në Fushë-Krujë, identifikohet autori i ngjarjes, arrestohet bashkëpunëtori i tij

Policia e Tiranës njoftoi sot (10 shkurt) se ka arrestuar bashkëpunëtorin e autorit që vendosi një sasi tritoli dhe hodhi në erë më 31 Janar të këtij viti në Fushë-Krujë, lokalin ‘Brazili i vjetër’.

I arrestuari është Mondi Topalli, 41 vjeç, teksa vijojnë kërkimet për kapjen e autorit kryesor, Mirgen Zalla.

NJOFTIMI ZYRTAR

Si rezultat i veprimeve hetimore dhe operacionale të kryera me qëllim zbardhjen dhe dokumentimin e plotë të ngjarjes së ndodhur me datë 31.01.2025, ku u dëmtua me lëndë plasëse, fasada e një lokali në Fushë Krujë, kanë bërë të mundur identifikimin dhe shpalljen në kërkim të autorit të ngjarjes shtetasin M. Z., 40 vjeç si dhe kapjen dhe ndalimin e shtetasit M. T., 41 vjeç, i identifikuar si bashkëpunëtori i shtetasit M. Z.

Shtetasi M. Z., dyshohet se ka vendosur lëndën plasëse në lokalin e shtetasit B. T., dhe më pas është larguar nga vendi i ngjarjes me automjetin e shtetasit M. T.  Gjatë kontrollit të banesës së shtetasit M. Z., shërbimet e Policisë kanë gjetur e sekuestruar një armë gjahu pa leje, një armë sportive dhe municion.

Shërbimet e Policisë po punojnë për kapjen e shtetasit M. Z. Materialet procedurale iu referuan Prokurorisë së Tiranës, për veprime të mëtejshme”.