Igli Tafa “emëron” pasardhësin në ASKS, a po anashkalohet kompetenca e Kryeministrit?

Emërimi i pasardhësit në Autoritetin Kombëtar për Sigurinë Kibernetike (ASKS) nga drejtuesi i ri i AKSHI-t, Igli Tafa, ka ngritur pikëpyetje serioze ligjore dhe institucionale, duke hapur debat mbi kompetencat reale për drejtimin e këtij institucioni strategjik.

Dy ditë më parë, Tafa u prezantua në krye të AKSHI nga kryeministri Edi Rama, pas pezullimit të ish-drejtoreshës Linda Karçanaj, e cila po hetohet nga SPAK për akuza që lidhen me grup kriminal dhe shkelje të barazisë në tendera.

Rama e cilësoi Tafën si një “asset” për Shqipërinë dixhitale, duke theksuar se ai kishte lënë angazhime ndërkombëtare për të kontribuar në një moment kritik, pas sulmeve kibernetike ndaj sistemeve shtetërore shqiptare.

Megjithatë, veprimet e fundit të Tafës kanë ngjallur polemika. Ndërsa më herët ai drejtonte ASKS, Tafa ka vendosur të caktojë si pasardhës Saimir Kapllani, duke anashkaluar dy zëvendësdrejtoreshat e institucionit dhe pa një proces të hapur.

Vendimi është publikuar në Fletoren Zyrtare dhe ka ngritur shqetësime për përputhshmërinë me ligjin nr. 25/2024 “Për Sigurinë Kibernetike”, i cili përcakton qartë se drejtori i përgjithshëm i ASKS emërohet dhe shkarkohet nga Kryeministri i Republikës së Shqipërisë.

Ky zhvillim ka rindezur debatin mbi mënyrën e funksionimit të institucioneve kyçe të digjitalizimit në vend. Kritikat fokusohen te mungesa e meritokracisë dhe perceptimi i një “qarku të mbyllur” në emërimet drejtuese, ku postet duket se kalojnë brenda të njëjtave struktura.

Publikimi i vendimit në Fletoren Zyrtare e bën çështjen edhe më të ndjeshme, pasi ngre dyshime nëse kemi të bëjmë me një veprim individual të Tafës apo me një precedent të ri institucional që sfidon kuadrin ligjor ekzistues.

Për momentin, mbetet e paqartë nëse do të ketë reagim zyrtar nga qeveria apo ndërhyrje për të sqaruar vlefshmërinë e këtij emërimi. Saga e emërimeve në institucionet e sigurisë kibernetike duket se është larg përfundimit.