Ilir Beqaj i kërkon GJKKO të dalë nga hekurat, ofron garanci pasurore

Ish-ministri i Shëndetësisë, Ilir Beqaj, i është drejtuar sërish Gjykatës së Posaçme me një kërkesë për ndryshimin e masës së sigurisë, duke kërkuar zëvendësimin e “arrest me burg” me një masë më të lehtë.

Në kërkesën e tij, Beqaj ka ofruar edhe një garanci pasurore prej 20 mijë eurosh, ndërsa kësaj radhe ka bashkëngjitur edhe një vendim të Gjykatës së Lartë, që lidhet me interpretimin e masave të sigurisë, në përpjekje për të mbështetur argumentet e tij ligjore.

Ai ndodhet në paraburgim që prej 4 korrikut 2024, pas arrestimit në kuadër të një hetimi për abuzim me fondet e Bashkimit Europian në strukturën SASPAC.

Sipas SPAK, Beqaj, në cilësinë e drejtorit të përgjithshëm të SASPAC, dyshohet se ka urdhëruar zhvillimin e procedurave fiktive të prokurimit gjatë viteve 2022–2023, në kundërshtim me rregullat e Bashkimit Europian për projektet e EUSAIR.

Prokuroria pretendon se këto tendera janë realizuar vetëm në letër, ndërsa fondet e përfituara kanë përfunduar në mënyrë të paligjshme, përmes skemave të organizuara dhe bashkëpunimeve me persona të tjerë të përfshirë në çështje.

Pritet që Gjykata e Posaçme të shqyrtojë kërkesën e ish-ministrit dhe të vendosë nëse do të ketë një ndryshim të masës së sigurisë në vijim të procesit.