300 milionë dollarë të sekuestruara

Një operacion i gjerë ndërkombëtar i koordinuar nga Interpoli ka goditur rrjete kriminale të përfshira në mashtrime online, duke çuar në arrestimin e rreth 5,800 personave dhe sekuestrimin e aseteve të paligjshme me vlerë afro 300 milionë dollarë.

Operacioni i koduar “First Light 2026”, i zhvilluar gjatë periudhës janar-prill, përfshiu autoritetet ligjzbatuese të 97 vendeve dhe kishte në fokus grupet kriminale që përdorin metoda të manipulimit psikologjik për të mashtruar individë dhe biznese, duke u marrë para, të dhëna personale apo informacione konfidenciale.

Sipas të dhënave të publikuara nga Interpoli, gjatë hetimeve u identifikuan rreth 142 mijë viktima të prekura nga skema të ndryshme mashtrimi, ku përfshihen shantazhi seksual online (sextortion), mashtrimet me investime, vjedhja e identitetit, mashtrimet emocionale në internet dhe sulmet ndaj llogarive të biznesit përmes komprometimit të e-maileve zyrtare.

Organizata Ndërkombëtare e Policisë Kriminale ka ngritur alarmin se këto forma kriminaliteti janë shndërruar në një kërcënim serioz global, duke prekur jo vetëm qytetarët, por edhe kompanitë private dhe institucionet publike.

Si u goditën rrjetet kriminale në vende të ndryshme

Gjatë operacionit “First Light 2026” u zbuluan dhe u goditën disa struktura kriminale që vepronin në vende të ndryshme të botës.

Në Eswatini, autoritetet arrestuan 82 persona dhe çmontuan një grup kriminal të përfshirë në organizimin e lojërave të paligjshme online dhe pastrimin e parave përmes skemave të bazuara në vjedhjen e identitetit.

Një tjetër rast i zbuluar nga hetuesit lidhej me një skemë të sofistikuar mashtrimi në Brazil. Autorët kishin krijuar një kopje false të një komisariati policie dhe, duke u shfaqur gjatë video-thirrjeve si punonjës të policisë, bindnin viktimat që të transferonin shuma parash me pretendimin se po i mbronin nga një kërcënim apo procedim penal i rremë.

Hetimet nxorën në pah edhe raste ku objektiv ishin kompani ndërkombëtare dhe individë të ndryshëm. Në Singapor, një kompani tregtare u sulmua nga persona që u paraqitën si furnitorë të rremë, duke tentuar të përfitonin përmes mashtrimit në komunikimet e biznesit.

Ndërkohë, në Macao, autoritetet arrestuan disa persona që hiqeshin si zyrtarë publikë dhe që kishin tentuar të përfitonin rreth 372 mijë dollarë nga një viktimë.

Interpoli theksoi se përhapja e mashtrimeve që bazohen te manipulimi psikologjik po kërkon një reagim gjithnjë e më të koordinuar mes vendeve, pasi grupet kriminale operojnë përtej kufijve dhe përdorin teknologjinë për të zgjeruar aktivitetin e tyre.

Sipas organizatës, bashkëpunimi ndërkombëtar mes strukturave policore mbetet një nga mjetet kryesore për identifikimin dhe goditjen e këtyre rrjeteve që synojnë qytetarët, bizneset dhe institucionet në mbarë botën.