Ish-ministrja e PS del kundër Ramës: Më pak pushtet për kryetarin!

Ish-ministrja socialiste Ermelinda Meksi ka dalë hapur në krah të zërave kritikë brenda Partisë Socialiste, duke kërkuar një reflektim të thellë mbi mënyrën se si funksionon partia sot. Sipas saj, demokratizimi nuk mund të mbetet një parullë formale, por duhet të përkthehet në mekanizma konkretë politikë dhe statutorë.

Në reagimin e saj publik, Meksi thekson se një nga sfidat më të mëdha për çdo forcë politike është aftësia për t’u vetëkorrigjuar. Ajo paralajmëron se mungesa e reflektimit, mbyllja ndaj kritikës dhe mosrinovimi i strukturave rrezikojnë të shkëpusin partinë nga baza dhe nga realiteti shoqëror.

Një nga propozimet kryesore që ajo hedh është rikthimi i zgjedhjeve të rregullta për strukturat drejtuese çdo katër vjet. Sipas Meksit, ky proces do të garantonte më shumë përfaqësim, balancë dhe legjitimitet brenda Partisë Socialiste.

Ajo ndalet edhe te mënyra e funksionimit të Asamblesë Kombëtare, duke kërkuar që ajo të jetë produkt i drejtpërdrejtë i votës së delegatëve të Kongresit dhe jo rezultat i anëtarësimeve automatike. Sipas saj, përfshirja “ex officio” e zyrtarëve zbeh rolin e zgjedhjes demokratike dhe dobëson përfaqësimin real të anëtarësisë.

Në të njëjtën linjë, Meksi argumenton se edhe pse deputetët dhe kryebashkiakët mbajnë përgjegjësi të rëndësishme publike, ata nuk mund të zëvendësojnë vullnetin e forumeve të partisë. Kjo bëhet edhe më problematike, sipas saj, në kushtet kur një pjesë e deputetëve vijnë nga lista të mbyllura, duke pasur lidhje më të dobët me bazën.

Një tjetër pikë kyçe e qëndrimit të saj lidhet me zgjedhjen e kryetarit të partisë. Meksi vëren se modeli “një anëtar, një votë”, në mungesë të garës reale dhe barazisë së instrumenteve politike, nuk ka prodhuar domosdoshmërisht më shumë demokraci. Përkundrazi, sipas saj, ky model ka kontribuar në përqendrimin e pushtetit në duart e kryetarit.

Si alternativë, ajo propozon që drejtuesi i partisë të marrë legjitimitetin përmes Kongresit, çdo katër vjet, në një proces që garanton debat të hapur, konkurrencë të ndershme dhe përballje reale mes alternativave.

Në përfundim, Meksi thekson se Partia Socialiste ka nevojë për më shumë kolegjialitet, meritokraci dhe hapësirë për mendimin ndryshe. Vetëm përmes një procesi të tillë, sipas saj, partia mund të rifitojë energjinë, besimin dhe rolin që ka pasur historikisht në jetën politike të vendit.

Ajo u bën thirrje brezave të rinj dhe figurave me përvojë brenda PS-së që të marrin përgjegjësinë për të udhëhequr këtë proces ndryshimi, duke kombinuar guximin për reformë me ruajtjen e vlerave mbi të cilat është ndërtuar partia.