Ish-Presidenti Alfred Moisiu shtrohet me urgjencë në Kardiologji

Ish-Presidenti i Republikës, Alfred Moisiu, është dërguar me urgjencë ditën e sotme në Qendrën Spitalore Universitare “Nënë Tereza” në Tiranë, pas një përkeqësimi të gjendjes së tij shëndetësore.

Sipas burimeve spitalore, Moisiu është paraqitur në QSUT me vështirësi në frymëmarrje dhe është shtruar menjëherë në repartin e Reanimacionit, pranë Klinikës së Kardiologjisë. Ai po mbahet nën kujdes të specializuar dhe monitorim të vazhdueshëm nga stafi mjekësor.

Nga informacionet e deritanishme mësohet se parametrat jetësorë të ish-kreut të shtetit janë stabël, ndërsa mjekët e Kardiologjisë ndodhen në gatishmëri të plotë për të ndjekur nga afër ecurinë e gjendjes së tij shëndetësore.