Iu nënshtrua një ndërhyrje kirurgjikale, ndërron jetë Mihal Mërkuri

Një i dënuar i sigurisë së lartë ka ndërruar jetë mëngjesin e sotëm në Qendrën Spitalore Universitare “Nënë Tereza”. Bëhet fjalë për Mihal Mërkurin, i cili po trajtohej në Reanimacionin Qendror pas një ndërhyrjeje kirurgjikale të kryer një ditë më parë.

Sipas të dhënave, vdekja ka ndodhur rreth orës 04:35 dhe dyshohet se është shkaktuar nga arresti kardiak, i shoqëruar me hemorragji në kokë. Mërkuri ishte shtruar në QSUT mbrëmjen e 18 janarit, rreth orës 20:21, pasi kishte shfaqur komplikacione serioze shëndetësore dhe ishte futur menjëherë në sallë operacioni për shkak të një hemorragjie të brendshme.

I ndjeri, i lindur më 25 janar 1979 në Sarandë, vuante një dënim prej 10 vitesh burg për veprat penale “vrasje me dashje e mbetur në tentativë” dhe “prodhim e mbajtje pa leje të armëve luftarake dhe municionit”. Ai ishte ekstraduar nga Greqia në qershor të vitit 2023 dhe fillimisht ishte vendosur në institucionin e vuajtjes së dënimit në Korçë, ndërsa në shkurt të vitit 2025 ishte transferuar në burgun e sigurisë së lartë në Burrel.

Autoritetet bëjnë me dije se për rastin po ndiqen të gjitha procedurat e parashikuara nga ligji, ndërsa rrethanat e plota të vdekjes po dokumentohen nga strukturat përkatëse.