Kapet ‘skifteri’ me biçikletë që bënte ‘kërdinë’ në Durrës (VIDEO)

Policia e Durrësit ka vënë në pranga një 37-vjeçar, i cili akuzohet se ka kryer disa vjedhje me thyerje në zona të ndryshme të qytetit bregdetar. Burime zyrtare bënë me dije se i arrestuari është shtetasi V. K., banues në Tiranë.

Operacioni policor, i koduar “Refleksi”, u zhvillua pas disa javësh hetime dhe administrimi pamjesh filmike që çuan në identifikimin e autorit. Sipas policisë, 37-vjeçari lëvizte me biçikletë nëpër lagje të ndryshme të Durrësit, ku thyen xhamat e makinave të parkuara dhe vidhte para, laptopë apo sende personale të drejtuesve të tyre.

Gjatë operacionit, ai u kap në flagrancë teksa tentonte të vidhte një automjet tjetër dhe u arrestua menjëherë nga efektivët. Hetimet kanë zbuluar se ai është përgjegjës për të paktën pesë vjedhje të ndodhura në lagjet nr. 6, 8 dhe 12 të qytetit.

Sipas të dhënave të policisë, viktimat janë shtetasit Xh. B., J. B., S. Q., L. K. dhe Xh. M., ndërsa nga automjetet e tyre janë marrë shuma parash, pajisje elektronike dhe sende me vlerë.

Policia dyshon se 37-vjeçari mund të jetë i përfshirë edhe në disa raste të tjera të ngjashme, ndaj hetimet po vijojnë në bashkëpunim me Prokurorinë e Durrësit për dokumentimin e plotë të veprimtarisë së tij kriminale.

Materialet procedurale i janë dërguar Prokurorisë pranë Gjykatës së Shkallës së Parë Durrës, për veprime të mëtejshme ligjore.