Kartës së Studentit “pijani lëngun” edhe për (minimumi) një vit!

Dhe shanset për të ndodhur sa më shpejt, janë zero. Këtë e tha vetë kreu i qeverisë Edi Rama, i cili deklaroi se Karta e Studentit do të mund të jetë gati në fund të 2019-ës. Por edhe kjo mbetet një premtim prej tij. Kjo kohë e gjatë, sipas shefit të mazhorancës, duhet që të përcaktohen qartë se cilat produkte e shërbime do të përfshihen në kartën e Studentit. Dhe për këtë duhet që Ministria e Arsimit të lidhë marrëveshje me bashkitë dhe autoritetet e tjera për të lehtësuar xhepat e studentëve.

Megjithatë, shefi i mazhorancës nuk la pa bërë ironi, e deri diku tallje me studentët, kur tha se “nuk është karta që i ka penguar studentët të shkojnë në teatër e muze, të jemi serioz”.

“Po bëhet një draft për mënyrën e aplikimit dhe çështje të tjera teknike, në janar 2019 do miratojmë dy vendime, dhe fundi i 2019-ës është afati i realizimit”, tha Rama gjatë një konference për mediat që mbajti pas mbledhjes së qeverisë këtë të mërkurë ku u morën vendime që reflektojnë deri diku kërkesat e studentëve.

Me kartën e studentit përfitohet transporti publik falas, aksesi në kinema, muze, e forma të tjera argëtuese, me vlera të reduktuara.