KLP ndryshon rregulloren para zgjedhjes së kreut të ri të SPAK
Pak orë para zgjedhjes KLP vë në dyshim transparencën !
Vetëm pak orë para votimit për kreun e ri të SPAK, Këshilli i Lartë i Prokurorisë ka kryer ndryshime të rëndësishme në rregulloren e zgjedhjes, duke ngritur pikëpyetje serioze mbi transparencën dhe synimet reale të këtij procesi.
Në kundërshtim me mënyrën se si u zgjodhën dy drejtuesit e mëparshëm të SPAK, Arben Kraja dhe Altin Dumani, KLP ka hequr votimin e hapur dhe e ka zëvendësuar atë me votim të fshehtë. Nga nesër, anëtarët e KLP do të votojnë me fletë të fshehta, çka i heq publikut çdo mundësi për të parë sesi secili anëtar mban përgjegjësi për votën e tij.
Ndryshime ka pësuar edhe pozita e kryetarit të KLP. Në rregulloren e vjetër, kryetarit i njihej e drejta e një vote të dytë në rast barazimi – një mekanizëm që më parë ka përcaktuar qartësisht fituesin. Me ndryshimin e ri, kjo e drejtë është hequr. Tani kryetari ka vetëm një votë, si çdo anëtar tjetër.
Vendimi më problematik lidhet me mbylljen e procesit për mediat. Votimi për kreun e SPAK do të zhvillohet pa praninë e gazetarëve; mediat do të lejohen vetëm gjatë prezantimit të platformave të kandidatëve. Kjo qasje bie ndesh me frymën e reformës në drejtësi, e cila synonte pikërisht rritjen e transparencës dhe besimit publik.
Burime nga mbledhja e sotme, e zhvilluar pa praninë e mediave, konfirmojnë debate dhe tensione mes anëtarëve, duke shtuar dyshimet se “diçka po përgatitet” pas dyerve të mbyllura.
Në garë për drejtimin e SPAK janë katër prokurorë: Adnan Xholi, Doloresa Musabelliu, Elvin Goga dhe Klodian Braho.Ata do të prezantojnë platformat e tyre, ndërsa votimi më pas do të vendosë se kush do të marrë drejtimin e institucionit kyç të luftës kundër korrupsionit të nivelit të lartë.
Sipas rregullores së re, fitues është kandidati që merr shumicën e votave shumicë që këtë herë do të jetë e padukshme për publikun
Adnan Xholi, Klodian Braho, Elvin Gogaj dhe Doloreza Musabelliu
Profilet e të katër kandidatëve:
Adnan Xholi
Adnan Xholi është emri më i përfolur deri më tani në garën për kreun e SPAK-ut, një nga njerëzit që qëndron në krah të drejtuesit Altin Dumani.
Xholi u lind në Dibër më 6 korrik 1975. Përfundoi studimet si jurist pranë Fakultetit të Drejtësisë. Ka marrë emërimin si prokuror më 6 janar 2004.
Ka pasur këto detyra:
01.05.1998-31.12.1999/ Oficer i Policisë Gjyqësore i Seksionit të Prokurorisë, në Prokurorinë e Rrethit Gjyqësor Tepelenë.
01.01.2000 – 31.12.2000/ Zëvendësdrejtues Prokurorie (Zv/Prokuror Rrethi), në Prokurorinë pranë Gjykatës së Rrethit Gjyqësor Gjirokastër.
01.01.2001-05.01.2004/ Prokuror në Prokurorinë pranë Gjykatës së Rrethit Gjyqësor Gjirokastër.
Janar 2004- Maj 2013/ Prokuror në Prokurorinë pranë Gjykatës së Shkallës së Parë për Krime të Rënda, Tiranë.
Gusht 2012- Dhjetor 2012/ Drejtues i Komanduar në Prokurorinë pranë Gjykatës së Rrethit Gjyqësor Lezhë.
Qershor 2013-2017/ Prokuror/Drejtor i Drejtorisë së Kontrollit të Hetimit dhe Ndjekjes Penale pranë Prokurorisë së Përgjithshme.
04.03.2015 – 28.09.2015/ Drejtues i Komanduar i Prokurorisë pranë Gjykatës së Shkallës së Parë për Krime të Rënda, Tiranës.
2017 – 23.07.2021/ Drejtor i Drejtorisë Gjyqësore në Prokurorinë e Përgjithshme/Prokuror.
23.07.2021 – aktualisht/ Prokuror në Prokurorinë e Posaçme kundër Korrupsionit dhe Krimit të Organizuar.
Doloreza Musabelliu
Doloreza Musabelliu u diplomua në vitin 2002 në Universitetin e Tiranës dhe në vitin 2005 në Shkollën e Magjistraturës.
Ka pasur këto detyra:
11.10.2004 -19.12.2019/ Prokurore në Prokurorinë pranë Gjykatës për Krimet e Rënda.
19.12.2019 – 31.01.2020/ Prokurore në Prokurorinë pranë Gjykatës së Shkallës së Parë Tiranë (pas pushimit së ekzistuari të Prokurorisë pranë Gjykatës për Krimet e Rënda).
Nga 31 janari 2020 dhe aktualisht është prokurore në Prokurorinë e Posaçme kundër Korrupsionit dhe Krimit të Organizuar (SPAK).
Elvin Gokaj
Elvin Gokaj gjatë viteve 1994 – 1998, ka përfunduar studimet e larta të ciklit 4-vjeçar, në Universitetin “Luigj Gurakuqi” në Shkodër. Ka marrë emërim si prokuror më 5 dhjetor 2000.
Ka pasur këto detyra:
2000-2007/ Prokuror në Prokurorinë pranë Gjykatës së Shkallës së Parë Mat.
2007-2012/ Prokuror në Prokurorinë pranë Gjykatës së Shkallës së Parë Elbasan.
2013-2014/ Prokuror në Prokurorinë pranë Gjykatës së Shkallës së Parë Durrës.
2014-2021/ Prokuror dhe drejtues në Prokurorinë pranë Gjykatës së Apelit Shkodër.
Nga 13 dhjetori 2021 dhe aktualisht, Gokaj mban detyrën e Prokurorit në Prokurorinë e Posaçme kundër Korrupsionit dhe Krimit të Organizuar (SPAK).
Klodian Braho
Klodian Braho u lind në Skrapar më 21 korrik 1982. Në vitet 2000-2004 kreu studimet në Fakultetin e Drejtësisë dhe në 2005-2008 studioi në Shkollën e Magjistraturës. Ai mori emërimin më 14 nëntor 2007.
Ka pasur këto detyra:
14.11.2007-2012/ Prokuror pranë Prokurorisë pranë Gjykatës së Rrethit Gjyqësor Berat.
2012-2015/ Prokuror pranë Prokurorisë së Gjykatës së Rrethit Gjyqësor Vlorë.
2014-2015/ Zv.drejtues i Prokurorisë pranë Gjykatës së Rrethit Gjyqësor Vlorë.
2015-19.12.2019/ Prokuror në Prokurorinë pranë Gjykatës së Shkallës së Parë për Krimet e Rënda Tiranë.
Nga 19 dhjetori 2019 dhe aktualisht është prokuror pranë Prokurorisë së Posaçme kundër Korrupsionit dhe Krimit të Organizuar (SPAK).
Keni një histori? Denonco anonimisht, identiteti juaj mbrohet.
Denonco
