Konferenca e NATO-s në Tiranë, ja rrugët që do të bllokohen

Në kuadër të zhvillimit të Konferencës së NATO-s për Mbrojtjen Kibernetike, e cila do të mbahet në datat 8–10 tetor 2025 në Pallatin e Kongreseve, Tiranë, Policia e Tiranës ka hartuar një plan të posaçëm masash për të garantuar sigurinë publike dhe mbarëvajtjen e aktivitetit ndërkombëtar.

Në këtë kuadër, autoritetet kanë njoftuar për kufizime të qarkullimit të automjeteve dhe këmbësorëve, në zona të caktuara të kryeqytetit, përgjatë datave 9 dhe 10 tetor.

Masat e njoftuara nga Policia e Tiranës:

Kufizim i lëvizjes së automjeteve në bulevardin “Dëshmorët e Kombit”, nga semafori pranë Presidencës deri te sheshi “Nënë Tereza” (duke përfshirë edhe vetë sheshin), rrugën “Gjergj Filipi”, si dhe në aksin që lidh hotelin “Marriott” me bulevardin “Dëshmorët e Kombit”;

Bllokim i qarkullimit të këmbësorëve në trotuarin nga hyrja e hotel “Rogner” deri te Pallati i Kongreseve, gjatë gjithë periudhës së konferencës.

Kufizimet do të jenë në fuqi nga ora 07:00 e datës 9 tetor deri në orën 15:00 të datës 10 tetor 2025.

Policia u bën thirrje qytetarëve dhe drejtuesve të mjeteve që të respektojnë sinjalistikën dhe udhëzimet e punonjësve të rendit, dhe të shmangin lëvizjet në zonat e kufizuara, për të evituar vonesa dhe pengesa në qarkullim.