Kthimi i shqiptarëve/ ‘Qeveria e pranoi edhe një propozim të PD’

Genc Pollo, politikani i PD, e vlerësoi sot faktin që Qeveria shqiptare më në fund e kishte marrë në konsideratë dhe e kishte pranuar edhe një propozim tjetër të Partisë Demokratike: të sillte në atdhe, mijëra shqiptarë të mbetur nëpër botë prej pandemisë, me avionët e Air Albania. Pollo theksoi faktin “më mirë vonë se kurrë”, që shqiptarët të mos ndiheshin të diskriminuar nga shteti i tyre.

Pollo shkroi në Fb: “9 ditë më parë, në emër të Partisë Demokratike, kërkova që qeveria të përdorë avionët e Air Albania per të sjellë në Shqipëri udhëtarët e mbetur në Europë. Qeveria e ka pranuar më në fund edhe këtë propozim tonin. Më mirë vonë se kurrë. Të paktën, nuk do të jenë më të diskriminuar dhe të harruar nga shteti i tyre.”