Kurti : Asnjë deklaratë e KFOR pas 30 orësh nga rrëmbimi i policëve nga serbët

Kryeministri Albin Kurti, gjatë fjalës së tij në Kuvend, ka kërkuar një reagim të menjëhershëm nga KFOR-i pas rrëmbimit të 3 policëve nga pala serbe në kufirin me Kosovën.

Kurti njoftoi se ka biseduar me të dërguarin e SHBA-së, Gabriel Escobar, lidhur me këtë ngjarje dhe kërkon nga KFOR-i një reagim emergjent.

Ai theksoi se gjatë rrëmbimit të tre policëve, pala serbe ka lënë gjurmë që nënvizojnë qëllimin e tyre.

“Kam biseduar me Escobar, ambasadorin Hovenier dhe po vij nga një takim i përbashkët me ambasadorët dhe zv.ambasadorët. Kemi informuar në mënyrë të hollësishme për ngjarjen e ditëve të kaluara. Pas 30 orëve dhe mungesës së një deklarate nga KFOR-i, unë kam shprehur protestën time për këtë heshtje, si dhe kërkesën për një reagim të menjëhershëm. Në vendin e ngjarjes janë gjetur gjurmët e këpucëve që tregojnë drejtimin drejt Serbisë. Ata jo vetëm që e kanë kryer rrëmbimin, por gjithashtu kanë lënë gjurmët e tyre me qëllim. Synimi i tyre ishte që të dihej se ata ishin aty në atë kohë”, tha ai.