Kurti flet për situatën në veri të Kosovës: Serbia kërkon të vazhdojë luftën të cilën e humbi

Në daljen e parë publike pas mbledhjes së jashtëzakonshme të Këshillit të Sigurisë së Kosovës, Kurti deklaroi se Serbia po kërcënon sërish me luftë.

Ai shtoi se në mbledhje u ra dakord për më shumë vigjilencë në lidhje me situatën.

“Ajo që ne e dinim prej kohësh u shpërfaqë në mënyrën më të egër të mundshme. Pas 23 viteve nga përfundimi i luftës, Serbia kërcënon sërish me luftë dhe me rikthimin e forcave të tyre ushtarake të cilat kanë kryer gjenocid në Kosovë”, ka thënë Kurti, duke shtuar se nuk “jemi kundër askujt sa i përket përkatësisë etnike”.

Kryeministri Kurti nënvizoi se paqja në veri të vendit mbetet e brishtë, pasi Serbia kërkon të rinisë një luftë të cilën e humbi një herë.

“Pako e Ahtisarit ishte kompromis i dhimbshëm, përmes së cilës komuniteti serb në Kosovë fitoi të drejta të garantuara e të zgjeruara. Integrimi i veriut nuk ndodhi as pas shpalljes së pavarësisë e as pas një dekade dialog në Bruksel”, ka thënë Kurti.

Kurti ka kritikuar edhe Qeveritë e kaluara, duke thënë se në të kaluarën me kriminelët si Radoiçiçi dhe Veselenoviçi bëhej marrëveshje edhe për të formuar Qeverinë e Kosovës.

Ai shtoi: “Ne në partneritet me BE dhe SHBA kemi toleruar shtyrje disa herë të zbatimeve të vendimeve tona, por çdo shtyrje i sakson afati. Nuk kemi hequr dorë nga asnjë vendim që kemi marrë.  Paligjshmëria nuk do të tolerohet në asnjë pjesë të vendit tonë”, tha kryeministri Kurti.