Kush ishte Klodian Kulla, nipi i ‘gjeneralit’ që i dha fund jetës

Trupi i pajetë i Klodian Kullës, nipit të Nehat Kullës, është gjetur në Fshatin Fshat të Klosit, përgjatë aksit të Rrugës së Arbrit. Sipas të dhënave paraprake, 39-vjeçari dyshohet se është hedhur nga ura e zonës—një ndër më të lartat në Ballkan, me rreth 160 metra lartësi, mbrëmjen e së hënës, rreth orës 23:40.

Pas njoftimit, forcat e zjarrfikësve, njësitë “Shqiponja” dhe policia e Burrelit zhvilluan kërkime intensive për disa orë në terrenin tepër të thepisur. Trupi u lokalizua dhe u nxor nga gremina vetëm në orët e para të mëngjesit. Rrethanat e plota të ngjarjes mbeten ende të paqarta, ndërsa pritet ekspertiza e policisë në Tiranë për të përcaktuar nëse kemi të bëjmë me vetëvrasje apo me një veprim të ndërtuar nga palë të treta.

Policia, në njoftimin zyrtar, bëri të ditur:

“Më datë 08.12.2025, rreth orës 23:40, tek ura e fshatit Fshat, bashkia Klos, shtetasi K.K., rreth 39 vjeç, dyshohet se është vetëhedhur nga ura dhe për pasojë ka humbur jetën. Si pasojë e terrenit të vështirë, pas disa orësh kërkimi nga shërbimet e Policisë dhe të Zjarrfikësve, u bë e mundur gjetja dhe nxjerrja e trupit nga gremina. Grupi hetimor, nën drejtimin e Prokurorisë, po punon për zbardhjen e rrethanave dhe dokumentimin ligjor të ngjarjes.”

Klodian Kulla ishte i njohur për autoritetet ligjzbatuese. Në prill të vitit 2021, ai u arrestua gjatë një operacioni të SPAK, i cili zbuloi një arsenal armësh dhe çoi në prangosjen e tij dhe të tetë personave të tjerë. Në atë kohë, i vëllai i tij, Akil Kulla, u shpall në kërkim, ndërsa në qershor të po atij viti GJKKO e dënoi me 8.8 vite heqje lirie.

Kulla ishte nipi i Nehat Kullës, figurës së njohur si “Gjenerali”, që drejtoi një nga grupet më të komentuar të Tufinës në vitet 1997–1998.