Laert Duraj i “Posta Shqiptare”, tender 200 mln lekë për imazhin

Zyrtarët e lartë të “Rilindjes” kanë një mani të spikatur për të shpenzuar shuma marramendëse nga paratë publike për të kuruar imazhin e tyre.

Projekti i aplikuar prej vitesh nga krye-rilindasi Edi Rama, tashmë është huazuar prej të gjithë zyrtarëve socialistë, të cilët kanë marrë poste drejtuese të rëndësishme.

Laert Duraj, Drejtori i Postës Shqiptare, ka vendosur së fundmi që të shpenzojë rreth 200 mijë dollarë për të përmirësuar imazhin e institucionit.

“Posta Shqiptare” ka shpallur tenderin për “Blerje sistem i dixhitalizuar radhe për klientët dhe përmirësimin e imazhit jashtë të zyrave qendër filial”. Fondi i parashikuar nga Posta Shqiptare për realizimin e këtij tenderi është saktësisht 19.940.000 lekë.

Në bazë të njoftimit zyrtar të Posta Shqiptare, kompanitë pritet të paraqesin ofertat e tyre deri në 25 Mars 2019.

Shpenzimi gati 200 mijë dollarë për imazhin e Postës pritet të realizohet në një periudhë 2-mujore.

“Posta Shqiptare” është një kompani publike, e cila financohet nga tarifat që përcakton për shërbimin që u ofron qytetarëve shqiptarë.

Një pjesë e këtyre të ardhurave, siç konstatohet nga procedura e tenderit, e publikuar së fundmi, shkon për shpenzime luksi, siç është përmirësimin e imazhit të institucionit.

Drejtori i “Posta Shqiptare”, Laert Duraj, është një prej zyrtarëve më të lartë të Partisë Socialiste. Ai u zgjodh pak muaj më parë Sekretar për Emigracionin në partinë që drejtohet nga Edi Rama.