Lëvizja “Bashkë” proteston kundër buxhetit të vitit 2026

Pas protestave të ish-kryeministrit Sali Berisha dhe Adriatik Lapajt, kundër qeverisë ka dalë edhe Lëvizja “Bashkë”. Aktivistët e saj dolën sot para Parlamentit për të kundërshtuar buxhetin e vitit 2026, duke mbajtur pankarta dhe mesazhe të drejtpërdrejta për qeverinë.

“Taksoni dhjamin, jo djersën”, është një nga parullat që mbajnë të rinjtë e lëvizjes, ndërsa një tjetër pankartë thotë: “Populli kundër korrupsionit dhe varfërisë”, duke ftuar qytetarët të bashkohen në protestë.

Protestat e “Bashkë” vijnë në vijim të lëvizjes “Shqipëria Bëhet”, e cila prej disa ditësh zhvillon tubime para Kryeministrisë, duke kërkuar dorëheqjen e Ramës. Në disa raste, aktivistët e Adriatik Lapajt janë përplasur fizikisht me forcat e policisë, të cilët i kërkuan largimin e çadrave të vendosura për të qëndruar gjatë natës. Lapaj e konsideroi këtë sjellje të papranueshme dhe kritikoi ndërhyrjen e policisë.

Lëvizja “Bashkë” dhe grupet e tjera opozitare duken të vendosura të shprehin pakënaqësinë ndaj qeverisë dhe politikave të saj ekonomike, duke i dhënë një intensitet të ri protestave qytetare në kryeqytet.