Linkloni i blinduar që shpëtoi dje Ramën nga Gjuta?

Të gjithë iu ka bërë përshtypje ditën e djeshme mbërritja e një mjeti të blinduar për të marrë Edi Ramën nga selia e Partisë Socialiste. Në kohën kur policia e shtetit është e gjitha në këmbë për të sekuestruar mjetet e blinduara edhe pse poseduesit mund t`i kenë të blera dhe me dokumentacion të rregullt, papritur del në skenë një tjetër mjet i kësaj kategorie dhe që thuhet se i përket shtetasit Olsi Rama.

Olsi është vëllai i kryetarit të PS-së, Edi Ramës, i cili ditën e djeshme nuk u lejua nga Garda të përdorte mjetin e tij të kryeministrisë nga frika se aty kishte kaluar me armë Vladimir Gjuta, djali nga Kukësi që u akuzua sikur donte t`i bënte keq Kryeministrit. Në lidhje me makinën e blinduar që shkoi dhe mori kryeministrin Rama ka reaguar edhe sekretari i përgjithshëm i Partisë Demokratike, Gazmend Bardhi.

Postimi i plotë i Gazmend Bardhit

“Çfarë fshihet pas TR 0370 T?!

Edi Rama lëvizi dje me një fuoristradë të blinduar private, në shkelje të shumë rregullave shtetërore. Makina private, “Lincoln” e blinduar, me targën TR 0370 T, me të cilin u largua Rama nga Partia Socialiste është automjeti privat i Olsi Ramës. Si i tillë, automjeti është i paprekshëm nga Policia, njësoj si Audi AA 003 GB i Saimir Tahirit, me të cilin lëviznin lirshëm trafikantët e drogës të bandës së Habilajve.

Duke qenë se OFL e Edi Ramës po mburret me ndalimin e mjeteve të blinduara, pse nuk e ndalon për verifikim edhe Lincolnin e blinduar të Olsi Ramës, që përdoret në shkelje të ligjit nga i vëllai Kryeministër? Ndërsa Edi dhe Olsi Rama duhet të japin vetë përgjigje për një pyetje të thjeshtë: Në çfarë aferash është përfshirë dhe çfarë e rrezikon Olsi Ramën, që është detyruar të përdorë një makinë të blinduar, e ndërtuar për të përballuar plumbat?!”