Makina luksoze në shënjestër të Policisë në Lezhë, bllokohet “Rolls-Royce”

Policia e Lezhës ka ndërmarrë një aksion të posaçëm ndaj automjeteve luksoze që qarkullojnë në qytet, duke vendosur në fokus verifikimin e origjinës së tyre, mënyrës së përfitimit dhe burimit të pasurisë së personave që i disponojnë.

Në kuadër të kontrolleve, shërbimet e Hetimit të Krimeve Ekonomike dhe Financiare, në bashkëpunim me Forcën e Posaçme Operacionale dhe Policinë Rrugore, kanë ndaluar dhe bllokuar një automjet të markës luksoze “Rolls-Royce”.

Gjatë verifikimeve për dokumentacionin dhe historikun e automjetit, përfshirë të dhënat mbi blerjen, shitjen dhe posedimin e tij, efektivët kanë konstatuar se mjeti nuk dispononte dokumentacionin zyrtar të nevojshëm.

Në këto kushte, automjeti është vendosur në bllokim administrativ, ndërsa materialet e grumbulluara gjatë kontrollit i janë përcjellë strukturave kompetente për vijimin e procedurave dhe nisjen e një hetimi pasuror.

Hetimi do të përqendrohet te pronari i automjetit, shtetasi me iniciale F. M., i cili rezulton me banim në Mbretërinë e Bashkuar. Në fokus të verifikimeve pritet të jetë burimi i pasurisë dhe mënyra se si është siguruar automjeti luksoz.

Sipas Policisë së Lezhës, kontrollet e përbashkëta do të vijojnë edhe gjatë ditëve në vazhdim dhe do të shtrihen te automjete të tjera të kategorisë luksoze.

Operacioni synon evidentimin dhe goditjen e rasteve kur mjete me vlerë të lartë dyshohet se lidhen me pasuri të krijuara nga veprimtari kriminale, si dhe parandalimin e trafikimit dhe përdorimit të automjeteve të përfituara përmes burimeve të paligjshme.