Me armë me vete në automjet, kapet 30-vjeçari në Kukës (VIDEO)

Një 30-vjeçar nga Kukësi, i identifikuar si Pllumb Veseli, është arrestuar nga policia gjatë operacionit të koduar “Akulli”. Ai u kap në lagjen nr.3 të qytetit, duke lëvizur me automjetin tip Touareg, ku uniformat blu gjetën një armë zjarri pistoletë dhe municion luftarak.

Arma dhe municioni u sekuestruan si prova materiale dhe janë dorëzuar për veprime të mëtejshme nga Prokuroria.

Operacioni u organizua nga Drejtoria Vendore e Policisë Kukës, në bashkëpunim me shërbimet e Komisariatit të Policisë Kukës dhe me mbështetjen e Forcës së Posaçme “Shqiponja”. Sipas njoftimit zyrtar:

“Bazuar në informacionet e siguruara në rrugë operative se një shtetas qarkullonte me armë zjarri, u organizua dhe finalizua operacioni policor ‘Akulli’. Si rezultat, u arrestua në flagrancë shtetasi P.V., 30 vjeç, banues në Kukës.”

Materialet procedurale janë kaluar pranë Prokurorisë për hetime dhe veprime të mëtejshme ligjore.