Autoritetet meksikane kanë vënë në pranga një shtetas hungarez të dyshuar për trafik ndërkombëtar droge, i cili rezultonte në listën e personave më të kërkuar nga Bashkimi Europian. Bëhet fjalë për Janos Balla, i njohur edhe me identitetin e rremë “Daniel Takacs”.
Operacioni u zhvillua në shtetin jugor Quintana Roo, ku i dyshuari u lokalizua dhe arrestua në zonën turistike të Playa del Carmen, konkretisht në bashkinë Benito Juarez. Sipas autoriteteve, ai ishte në kërkim ndërkombëtar nga Interpol për përfshirje në shpërndarje të narkotikëve dhe substancave psikotrope.
Ministri i Sigurisë në Meksikë, Omar Garcia Harfuch, konfirmoi se Balla kishte një dënim prej gjashtë vitesh burg në Europë dhe ndaj tij ishte lëshuar një urdhër arresti ndërkombëtar. Kapja e tij u bë e mundur falë bashkëpunimit mes agjencive të sigurisë të Meksikës dhe Hungarisë, në një operacion të mirëkoordinuar.
Pas ndalimit, i arrestuari është transferuar në Institutin Kombëtar të Migracionit të Meksikës, ku po verifikohet statusi i tij dhe pritet të nisë procedura për kthimin e tij në Europë.
Ky zhvillim vjen në kuadër të një strategjie më të ashpër kundër krimit të organizuar të ndjekur nga presidentja Claudia Sheinbaum. Ajo ka ndryshuar qasjen e mëparshme të ndjekur nga paraardhësi i saj, Andres Manuel Lopez Obrador, duke vendosur fokus më të fortë tek goditja direkte e rrjeteve kriminale dhe bashkëpunimi ndërkombëtar, veçanërisht me SHBA-në.
Edhe presidenti amerikan Donald Trump ka ushtruar presion publik për masa më të forta ndaj kartelëve të drogës që operojnë në territorin meksikan. Autoritetet në Meksikë kanë theksuar se kohët e fundit është rritur ndjeshëm numri i arrestimeve të figurave të rëndësishme të krimit.
Ndërkohë, në prag të organizimit të Kupës së Botës 2026, qeveria ka paralajmëruar masa të forta sigurie, duke përfshirë dislokimin e deri në 100 mijë efektivëve për të garantuar rendin gjatë eventit.
Pavarësisht kritikave për disa praktika të bashkëpunimit ndërkombëtar, autoritetet meksikane mbrojnë veprimet e tyre si të domosdoshme për ruajtjen e sigurisë kombëtare dhe përballimin e kërcënimeve nga krimi i organizuar.
