Meta i përgjigjet Ramës: Tmerrohu, nuk ka më ‘tërmet’ votash

Presidenti Ilir Meta, ka reaguar menjëherë pas deklaratave të kryeministrit Edi Rama ditën e sotme nga Fieri, ku shigjetonte kreun e shtetit për procesin e vaksinimit të personaliteteve mbi 80 vjeç.

Përmes një mesazhi në ‘Facebook’, Meta thotë që le të shqetësohen e madje të tmerrohen ata që mendojnë se do të bëjnë “tërmet” në zgjedhje, qofshin këta qeveritarë, apo banditë.

Postimi i Presidentit Ilir Meta në Facebook:

Janë të shqetësuar nga mesazhet e Presidentit?!

Le TË SHQETËSOHEN dhe le TË TMERROHEN të gjithë ata, të cilët mendojnë se do bëjnë “tërmet” në zgjedhje, si në Dibër, apo si në Shijak, qofshin këta qeveritarë, punonjës policie; qofshin banditë, gjithçka qofshin.

Mëngjesin e sotëm Rama e sulmoi sërish nga Fieri presidentin Meta, i cili ka qenë mjaft kritik me mënyrën se si qeveria po e menaxhon pandeminë në vendin tonë.

Kryeministri gjithashtu ka shigjetuar edhe ish-presidentin Bujar Nishani dhe akademikun Artan Fuga, të cilët janë shfaqur kundër vaksinimit selektiv që ka paralajmëruar kryeministri.