Meta: U cënua siguria kombëtare, mund të kishte pasoja tragjike për njerëzit

Presidenti i Republikës, Ilir Meta tha se grabitja e djeshme në Rinas ka cenuar sigurinë kombëtare.

“Si president i Republikës e konsideroj ngjarjen cenim serioz të sigurisë kombëtare, të rendit publik dhe imazhit të vendit tonë. u kërkoj agjencive ligjzbatuese të vazhdojnë operacionin për kapjen e personave përgjegjës dhe gjetjen e vlerave monetare.

Të gjitha autoritetet përgjegjëse të kryejnë hetime të plota dhe të thella për zbardhjen e shpejtë të kësaj ngjarje të rëndë. Të nxirren përgjegjësitë e plota për çdo institucion, që nuk ka kryer detyrën sipas ligjit për prandalimin e kësaj ngjarje që mund të kishte pasur pasoja tragjike për jetën e qytetarëve tanë dhe të huaj”, tha Meta.

Kreu i Shtetit kërkoi nga Prokuroria që të hetojë jo vetëm autorët e grabitjes, por edhe përgjegjësinë e institucioneve përkatëse.

Presidenti bëri me dije edhe pikat e një mbledhjeje të Këshillit të Sigurisë Kombëtar i mbajtur më 8 qershor 2018, ku janë evidentuar dy problematika kryesore: Pika e parë, mungesa e përgjegjësive të qarta mbi garantimin e sigurisë në aeroport si dhe pika e dytë, mangësitë në akses për ndërhyrjen e duhur të policisë së shtetit në rast rreziku.