“Mjekët po fshehin të vërtetën”/ 14-vjeçarja bëri operacion fshehurazi nga i ati, humbi jetën tragjikisht

Një ngjarje tronditëse ka ndodhur në Durango të Meksikës, ku një 14-vjeçare, Paloma Nicole Arellano, humbi jetën pas një ndërhyrjeje të dyshuar estetike për zmadhimin e gjoksit, të kryer fshehurazi nga babai i saj.

Adoleshentja ndërroi jetë një javë pas operacionit, në spitalin ku u trajtua. Në certifikatën e vdekjes u shënua si shkak “edemë cerebrale e shkaktuar nga një sëmundje respiratore”. Por babai i saj, Carlos Arellano, pretendon se ky është një manipulim i qëllimshëm.

“Certifikata e vdekjes së saj shkruante gabimisht ‘sëmundje’, në një përpjekje për të fshehur të vërtetën. E mora vesh vetëm në funeral, kur pashë shenjat dhe implantet e gjirit”, – tha ai, duke shtuar se dokumenti iu dha me nxitim, pa hetime të thelluara.

I dërrmuar nga humbja, ai ka depozituar një ankesë zyrtare duke kërkuar që të hetohen të gjithë përgjegjësit për ndërhyrjen që i mori jetën së bijës. Autoritetet meksikane kanë konfirmuar se kanë nisur hetimet.

Tragjedia e Palomës vjen vetëm pak ditë pasi një 28-vjeçare humbi jetën në Brazil, gjatë një ndërhyrjeje estetike për ngritjen e vitheve, duke ngritur alarmin për rreziqet e procedurave estetike të kryera pa kontroll të rreptë mjekësor.