Një i vdekur dhe disa të plagosur

Një aksident i rëndë detar është regjistruar mbrëmjen e sotme në Gjirin e Ksamilit, duke tronditur një nga zonat më të frekuentuara turistike në jug të vendit. Sipas informacioneve paraprake, një mjet lundrues është përplasur me skafin e Policisë Kufitare të Sarandës, në rrethana që ende nuk janë sqaruar plotësisht.

Si pasojë e përplasjes, ka humbur jetën 20-vjeçari Albiano Kreçi, banor i Ksamilit. Lajmi për vdekjen e tij është konfirmuar nga burime pranë vendngjarjes, ndërsa dyshohet se edhe persona të tjerë kanë mbetur të plagosur.

Menjëherë pas aksidentit, në zonë janë angazhuar forca të shumta policie, si dhe ekipet e emergjencës, të cilat kanë ndërhyrë për të menaxhuar situatën dhe për të transportuar të lënduarit drejt spitalit. Deri më tani raportohet se të paktën dy persona janë dërguar në Urgjencën e Spitalit të Sarandës për ndihmë mjekësore.

Sipas të dhënave paraprake, njëri prej të transportuarve, Albiano Kreçi, nuk ka mundur t’i mbijetojë plagëve të marra nga përplasja. Gjendja shëndetësore e personave të tjerë mbetet ende e paqartë.

Ndërkohë, autoritetet kanë nisur hetimet për të zbardhur shkaqet dhe dinamikën e këtij aksidenti tragjik, ndërsa pritet një reagim zyrtar për të hedhur më shumë dritë mbi rrethanat e ngjarjes.