Moska kërcëon: Nëse NATO rrëzon avionët, fillon lufta!

Rusia rrit tensionet me NATO-n: dronë, avionë luftarakë dhe kërcënime të hapura lufte

Incidentet e fundit në veri të Europës dhe në hapësirën ajrore të vendeve anëtare të NATO-s po rrisin rrezikun e një përplasjeje të drejtpërdrejtë me Rusinë.

Provokimet ajrore dhe valë dronësh

Në Danimarkën perëndimore janë regjistruar fluturime misterioze dronësh mbi aeroporte dhe baza ushtarake në Jutland, duke alarmuar autoritetet daneze dhe ngritur në qiell shqetësimet për sigurinë kombëtare. Ngjarje të ngjashme u raportuan edhe në Suedi, mbi ishujt Styrkoe dhe Tjurkoe të arkipelagut Karlskrona, ndërsa Polonia rrëzoi tre dronë rusë brenda hapësirës së saj ajrore më 10 shtator.

Pak ditë më vonë, një avion pa pilot u regjistrua për gati një orë duke fluturuar mbi territorin e Rumanisë. Estonia raportoi se tre avionë MiG-31 rusë shkelën hapësirën e saj ajrore për 12 minuta më 19 shtator.

Reagimi i NATO-s dhe përplasja diplomatike

Përballë këtyre provokimeve, avionët luftarakë të NATO-s u ngritën nga bazat në Lituani për të monitoruar pesë avionë rusë që iu afruan hapësirës ajrore të Letonisë, ndërsa Shtetet e Bashkuara pikasën katër avionë luftarakë rusë pranë Alaskës.

Një takim i tensionuar diplomatik u zhvillua në Moskë mes ambasadorëve britanikë, francezë dhe gjermanë me përfaqësues të Kremlinit. Sipas burimeve të Bloomberg, aleatët evropianë paralajmëruan se çdo shkelje tjetër e hapësirës ajrore do të marrë përgjigje të menjëhershme, duke përfshirë edhe rrëzimin e avionëve rusë.

Kërcënimet nga Moska

Ambasadori i Rusisë në Francë, Alexey Meshkov, paralajmëroi se “nëse NATO rrëzon avionë luftarakë rusë, kjo do të thotë luftë”, duke e quajtur akuzat për provokime “të pabazuara”. Zëdhënësi i Kremlinit, Dmitry Peskov, këmbënguli se fluturimet ushtarake ruse janë në përputhje me rregullat ndërkombëtare.

Një klimë në prag konflikti

Këto zhvillime ndodhin ndërkohë që presidenti amerikan Donald Trump kërkon nga Ukraina rimarrjen e territoreve të pushtuara, ndërsa mbështetja perëndimore për Kievin përballet me sfida. Sekretari i Përgjithshëm i NATO-s, Mark Rutte, deklaroi se Aleanca “është gati të rrëzojë çdo avion rus që shkel territorin e saj, nëse është e nevojshme”.

Rritja e incidenteve dhe retorika e ashpër nga të dyja palët tregojnë se tensionet mes Rusisë dhe NATO-s po afrohen gjithnjë e më shumë drejt një përplasjeje të hapur, duke e bërë sigurinë në Europën Veriore një nga sfidat më të mëdha të momentit.