Mrekullia! Nëna me fëmijët nxirren të gjallë 11 ditë pas tërmetit

Një histori që duket e pabesueshme ka ardhur nga Venezuela, vendi i goditur rëndë nga tërmetet e fuqishme të 24 qershorit. Një nënë dhe tre fëmijët e saj janë nxjerrë të gjallë nga rrënojat pas 11 ditësh qëndrimi të izoluar nën një ndërtesë të shembur.

Operacioni i shpëtimit u zhvillua në zonën e La Guaira, një prej rajoneve më të prekura nga lëkundjet sizmike. Familja kishte mbetur e bllokuar nën rrënojat e një pallati banimi që nga momenti i shembjes së tij, duke mbijetuar në kushte ekstreme.

Sipas autoriteteve, nëna arriti të mbante gjallë tre fëmijët e saj gjatë gjithë periudhës së izolimit, duke i ushqyer me gji ndërsa prisnin ndihmën e ekipeve të emergjencës.

Pas ditësh kërkimesh intensive, ekipet e shpëtimit arritën të lokalizonin vendndodhjen e familjes dhe të hapnin një rrugë për t’i nxjerrë të katërt gjallë nga rrënojat. Rasti është cilësuar si një mrekulli në mes të një prej katastrofave më të rënda që ka përjetuar vendi.

Ndërkohë, bilanci i tërmeteve vijon të mbetet tragjik. Sipas të dhënave zyrtare, 3,685 persona kanë humbur jetën dhe 16,740 të tjerë janë plagosur, ndërsa mijëra njerëz vijojnë të rezultojnë të zhdukur.

Fatkeqësia natyrore ka shkaktuar dëme të mëdha materiale, duke shkatërruar ose dëmtuar rreth 60 mijë ndërtesa dhe duke lënë mijëra familje pa strehim.

Autoritetet dhe ekspertët kanë paralajmëruar se situata mund të përkeqësohet edhe më tej për shkak të rrezikut të shpërthimit të sëmundjeve infektive. Mungesa e ujit të pijshëm dhe kushtet e vështira higjieno-sanitare në zonat e prekura përbëjnë një kërcënim serioz për banorët që kanë mbijetuar nga katastrofa.