Momenti kur përplaset me shitësen

Një 26-vjeçare ka rënë në prangat e policisë së kryeqytetit pas përfundimit të një operacioni policor të koduar “Intervali”, i cili synonte goditjen e rasteve të vjedhjeve me dhunë në Tiranë.

Sipas të dhënave nga hetimi, e reja dyshohet se gjatë muajit shkurt ka kryer dy grabitje me dhunë, ndërsa në muajin janar rezulton të ketë realizuar edhe një tjetër vjedhje në një subjekt. Nga verifikimet e kryera ka rezultuar se ajo nuk është një emër i panjohur për autoritetet, pasi më herët është dënuar për vjedhje të pronës.

Mësohet gjithashtu se në momentin kur dyshohet se ka kryer këto vepra penale, 26-vjeçarja ishte nën masën e sigurisë “arrest shtëpie”, të vendosur për të njëjtin krim.

Sipas hetimeve paraprake, ajo dyshohet se:

• më 7 shkurt 2026 ka kryer një vjedhje me dhunë në një subjekt;

• më 20 shkurt 2026 i ka marrë me forcë një shumë parash një qytetari;

• më 3 janar 2026 ka realizuar një tjetër vjedhje në një subjekt tregtar.

Autoritetet po vijojnë hetimet për të verifikuar nëse 26-vjeçarja mund të jetë e përfshirë edhe në raste të tjera të ngjashme të ndodhura në kryeqytet.

Ndërkohë, materialet procedurale i janë përcjellë Prokurorisë së Tiranës, e cila pritet të ndjekë hapat e mëtejshëm ligjorë lidhur me këtë çështje.