“Në Farmacinë Qendrore të QSUT-së ruheshin barna të skaduara”

Një raport i fundit i Kontrollit të Lartë të Shtetit (KLSH) ka hedhur dritë mbi një shkelje të rëndë në sistemin farmaceutik të Qendrës Spitalore Universitare “Nënë Tereza” (QSUT).

Sipas raportit, Farmacia Qendrore e QSUT-së ka mbajtur në gjendje aktive dhe ka përdorur barna të skaduara, duke mashtruar sistemin dhe duke vënë në rrezik jetën e pacientëve.

Gazetari Osman Stafa, duke ngritur alarmin për shëndetin e pacientëve me tumor, thekson se barnat e dyshuara janë përdorur edhe tek këta pacientë, duke thelluar shqetësimet për cilësinë dhe sigurinë e trajtimeve.

Kjo zbulim vjen në një kohë kur siguria e pacientëve dhe transparenca në sistemin shëndetësor janë tema kritike për publikun dhe autoritetet.

Postimi i gazetarit

Raporti i Kontrollit të Lartë të Shtetit ka zbuluar se Farmacia Qendrore e QSUT-së ka mbajtur në gjendje aktive barna të skaduara, duke mashtruar sistemin dhe duke rrezikuar pacientët.

Konkretisht, në sistemin elektronik Pentaho figuronin si stok aktiv:

-19 flakonë Ifosfamide 1 g

-602 flakonë Methotrexate në dy formëdoza (500 mg dhe 50 mg/2 ml)

(Këto barna janë për të sëmurët me kancer)

KLSH shkruan:

“Pavarësisht se kanë skaduar, këto barna rezultojnë ende në sistemin Pentaho duke paraqitur risk për mbajtjen e stoqeve të skaduara në sistem dhe duke rritur artificialisht gjendjen e barnave.”

Kjo nuk është thjesht pakujdesi. Është dështim i drejtpërdrejtë i Farmacisë Qendrore, që nuk ka hequr barnat e skaduara nga përdorimi dhe ka manipuluar inventarin, duke krijuar përshtypjen e rreme se ka rezerva ndërkohë që pacientët mbeten pa trajtim.

Ajo që nuk dimë është se këto barna të skaduara, a janë përdorur mbi pacientë?

E frikshme kjo gjetje!