Në Shqipëri ka më shumë gra se burra!

Të dhënat e fundit tregojnë se në fund të vitit 2025 në Shqipëri jetonin rreth 28 mijë gra më shumë se burra, pavarësisht se lindjet vijojnë të jenë në favor të djemve. Gratë kanë gjithashtu peshë të konsiderueshme në arsimin e lartë, ndërsa përfaqësimi i tyre në Kuvend mbetet më i ulët.

Gratë përbëjnë shumicën e popullsisë në Shqipëri, me një diferencë prej rreth 28 mijë personash ndaj burrave. Sipas të dhënave të INSTAT, në fund të vitit 2025 në vend jetonin 1,181,981 gra dhe 1,153,949 burra.

Ky raport vjen në kontrast me situatën në lindje, ku djemtë vijojnë të jenë më të shumtë se vajzat. Në Shqipëri lindin mesatarisht 108 djem për çdo 100 vajza, duke ruajtur një prirje të qëndrueshme në raportin gjinor të lindjeve.

Megjithatë, balanca ndryshon me kalimin e moshës. Emigracioni më i lartë i meshkujve dhe jetëgjatësia më e madhe e grave janë ndër faktorët që ndikojnë në përbërjen gjinore të popullsisë dhe në epërsinë numerike të grave në total.

Gratë dominojnë në arsimin e lartë, por jo në përfaqësimin politik

Epërsia numerike e grave vihet re edhe në fushën e arsimit. Sipas të dhënave të bëra publike, rreth 65% e grave kanë arsim të lartë, çka tregon pjesëmarrjen e tyre të konsiderueshme në nivelet më të larta të edukimit.

Ndërkohë, në politikë, përfaqësimi i grave mbetet më i ulët në raport me peshën që ato kanë në popullsi. Gratë përbëjnë rreth një të tretën e deputetëve në Kuvendin e Shqipërisë, duke evidentuar hendekun mes përbërjes demografike dhe përfaqësimit në institucionin ligjvënës.