‘Neomalsorja’ niset drejt Tiranës: Do t’i bashkohem protestës

Deputetja e pavarur Marjana Koçeku, e njohur publikisht si “Neomalsorja”, ka njoftuar se do t’i bashkohet protestës që zhvillohet para Kryeministrisë në Tiranë, e cila sot shënon ditën e saj të 49-të radhazi.

Përmes një videoje të publikuar në rrjetet sociale, Koçeku shprehet se është rrugës drejt kryeqytetit për t’iu bashkuar qytetarëve në protestë, duke e cilësuar rezistencën e tyre si frymëzuese dhe të qëndrueshme.

“Do t’i bashkohem protestës që sot është në ditën e 49-të. Është frymëzuese dhe e bukur rezistenca e qytetarëve dhe rinisë gjatë gjithë këtyre ditëve dhe nuk duket se do të ndalet,” shprehet ajo në mesazhin e saj publik.

Edhe këtë të premte, qytetarë dhe aktivistë pritet të mblidhen përpara godinës së Kryeministrisë, ku kërkohet dorëheqja e kryeministrit Edi Rama, në një nga seritë më të gjata të protestave të vazhdueshme në vend.

Marjana Koçeku u largua nga grupi parlamentar socialist rreth një muaj më parë, duke shënuar një kthesë të fortë në qëndrimet e saj politike. Pas daljes nga mazhoranca, ajo ka artikuluar kritika të drejtpërdrejta ndaj qeverisë dhe kryeministrit, ndërsa tashmë i është bashkuar thirrjeve për largimin e tij nga detyra.

Pjesëmarrja e saj në protestë shihet si një zhvillim me peshë politike, që mund të ndikojë në dinamikën e mëtejshme të kësaj lëvizjeje qytetare.