‘Neomalësores’ sulmon qeverinë: Shteti nuk zëvendësohet me spektakël

Deputetja Marjana Koçeku, e cila prej disa javësh është larguar nga Grupi Parlamentar i Partisë Socialiste, ka reaguar publikisht kundër vendimit të qeverisë për të financuar me 4 milionë euro koncertin e reperit amerikan Kanye West.

Përmes një postimi në rrjetet sociale, Koçeku argumenton se kjo shumë duhej të ishte përdorur për forcimin e kapaciteteve të mbrojtjes civile, parandalimin e zjarreve dhe mbështetjen e komuniteteve që përballen çdo vit me pasojat e tyre.

Deputetja kujton situatën e rëndë të zjarreve gjatë vitit të kaluar, duke theksuar se dëmet në natyrë kanë qenë të mëdha dhe se këtë verë rreziku pritet të jetë edhe më i lartë për shkak të temperaturave ekstreme.

Sipas saj, fondet publike duhet të orientohen drejt investimeve që rrisin sigurinë dhe aftësinë e vendit për t’u përballur me emergjencat, jo për aktivitete që i cilëson si të përkohshme.

“Në vend që 4 milionë euro të shkonin për një stadium njëpërdorimësh, ato duhej të investoheshin në parandalimin e zjarreve, në mbështetjen e banorëve dhe në forcimin e kapaciteteve të emergjencave,” shprehet deputetja.

Në reagimin e saj, Koçeku thekson gjithashtu se, sipas saj, “shteti dhe llogaridhënia nuk zëvendësohen me spektakël”, ndërsa mbyll mesazhin duke nënvizuar se humbja e natyrës është humbje për të gjithë Shqipërinë.