Kryeministri i Spanjës, Pedro Sánchez pritet që nesër të marrë një vendim nëse do të japë apo jo dorëheqjen, pasi bashkëshortja e tij akuzohet për korrupsion.
Sipas The Guardian, Sanchez është duke reflektuar për të ardhmen e tij.
“Tani që kemi arritur në këtë pikë, pyetja që në mënyrë mjaft legjitime i bëj vetes është: a ia vlen e gjithë kjo? Sinqerisht nuk e di. Më duhet të ndalem dhe të mendoj për të”, shkruan kryeministri në letrën e tij.
Sánchez këmbënguli se gruaja e tij është e pafajshme dhe akuzoi hapur partinë konservatore Popullore (PP) dhe partinë e ekstremit të djathtë Vox për bashkëpunim me Manos Limpias dhe mediave që e sulmojë. Ai e quajti një përpjekje për të sjellë “kolapsin e tij personal dhe politik” duke sulmuar gruan.
Letra e Sánchez, të cilën ai mendohet se e ka shkruar vetë dhe pa u konsultuar me këshilltarët e tij është përshkruar nga aleatët e tij si personale, e shkruar nga një burrë i verbuar nga dashuria dhe mbrojtja nga sulmet ndaj gruas së tij, të cilat janë përshkallëzuar gjatë viteve të fundit.
“Ne shpesh harrojmë se ka njerëz pas politikanëve. Nuk jam i turpëruar të them se jam një burrë që është thellësisht i dashuruar me gruan e tij dhe që duhet të jetojë me pafuqinë për të parë gjithë baltën që i hidhet asaj çdo ditë”, shkroi kryeministri.
