Nga patëllxhani te speci, Korreshi krahason ministrat me perime

Deputeti i Partisë Demokratike, Saimir Korreshi, ka zgjedhur ironinë dhe satirën për të sulmuar qeverinë. Ai përdori krahasime simbolike me perime, të cilat i vendosi përballë vetes në studio, duke i lidhur secilën me figura të rëndësishme të kabinetit qeveritar.

Me tone thumbuese, Korreshi i dha secilit ministër një “etiketë” metaforike, duke pretenduar se përmes këtyre krahasimeve përfaqësohej mënyra se si ata ushtrojnë pushtetin dhe ndikojnë në qeverisje. Kryeministri Edi Rama u krahasua me “patëllxhanin”, ministrja e Brendshme me “specin e kuq”, ajo e Shëndetësisë me “qitron”, ndërsa ministrja e Turizmit me “limonin”.

Deputeti demokrat nuk la pa përmendur as ministren Mirela Kumbaro, të cilën e krahasoi me lulelakrën, ndërsa Elisa Spiropalin e përshkroi si “hudhrën”, duke vijuar linjën ironike të kritikës së tij politike.

Vëmendje të veçantë ai i kushtoi zëvendëskryeministres Belinda Balluku, e cila aktualisht ndodhet nën hetim nga SPAK.

Korreshi e krahasoi atë me “panxharin”, duke shtuar se “lekët e bëjnë sheqer e mjaltë”, një koment që u interpretua si një thumbim i drejtpërdrejtë ndaj çështjeve për të cilat po hetohet nga organet e drejtësisë.

Deklaratat e Korreshit në emisionin “Oponencë” ndezën debat dhe reagime, duke rikthyer në vëmendje gjuhën ironike si mjet të përplasjes politike në studiot televizive.