Nuk ndalen skandalet, shkatërrohet edhe linja hekurudhore në Librazhd

Një situatë me pasoja të rënda për infrastrukturën kombëtare është krijuar në zonën e njohur si “Arrat e Gurrës”, në Dragostunjë të Librazhd, ku brenda pak ditësh janë goditur njëkohësisht tre nyje kyçe: rruga kombëtare, rrjeti i transmetimit të energjisë dhe linja hekurudhore.

Pas dëmtimit të segmentit rrugor në aksin që lidh Librazhdin me Përrenjas, si dhe problematikave në aksin Qukës–Qafë Plloçë, situata u përshkallëzua me goditjen e bazamentit të një shtylle të tensionit të lartë dhe më pas me shkatërrimin e plotë të një segmenti të linjës hekurudhore Elbasan–Librazhd–Përrenjas–Gur i Kuq.

Hekurudha jashtë funksionit

Sipas të dhënave paraprake, fundosja dhe zhvendosja masive e tokës kanë prekur rëndë bazamentin e hekurudhës në segmentin Librazhd–Xhyrë, duke e nxjerrë plotësisht jashtë funksionit këtë pjesë të trasesë, e cila shtrihet paralel me rrugën automobilistike dhe me rrjedhën e lumit Shkumbin.

Strukturat mbajtëse janë dëmtuar në mënyrë të pakthyeshme, ndërsa shinat rezultojnë të deformuara dhe të zhvendosura. Në këto kushte, çdo tentativë për qarkullim hekurudhor në këtë zonë është e pamundur deri në ndërhyrje të thelluar inxhinierike.

Rrezik për rrjetin energjetik

Paralelisht, është dëmtuar edhe shtylla nr. 15 e tensionit të lartë 110 kV, një element thelbësor për furnizimin energjetik të zonës. Zhvendosja dhe fundosja e bazamentit përbëjnë rrezik serioz për stabilitetin e rrjetit, ndërsa specialistët po monitorojnë situatën për të shmangur pasoja zinxhir në sistemin e transmetimit.

“Gjeografia e shkatërrimit”

Prej disa ditësh, territori në “Arrat e Gurrës” ka marrë përmasa alarmante. Rrëshqitjet masive të dheut kanë përfshirë një segment të rrugës kombëtare, një shtyllë të tensionit të lartë dhe tashmë edhe linjën hekurudhore, duke krijuar një zinxhir dëmtimesh që prek drejtpërdrejt qarkullimin rrugor, transportin hekurudhor dhe furnizimin me energji.

Kjo situatë e paprecedentë për zonën ka izoluar përkohësisht lidhje strategjike jo vetëm brenda qarkut të Elbasan, por edhe në një pjesë të konsiderueshme të korridorit lindor të Shqipërisë. Autoritetet përballen me një sfidë të trefishtë: stabilizimin e terrenit, rikthimin e sigurisë në rrugë dhe rindërtimin e segmenteve të shkatërruara.

Ekspertët paralajmërojnë se ndërhyrja do të kërkojë kohë, investime të konsiderueshme dhe studime të detajuara gjeologjike, pasi lëvizjet e tokës në këtë zonë rezultojnë aktive dhe me risk të vazhdueshëm.

Ndërkohë, banorët dhe bizneset lokale po përballen me pasoja të drejtpërdrejta ekonomike dhe sociale. “Arrat e Gurrës” është kthyer në një pikë kritike që teston qëndrueshmërinë e infrastrukturës në një nga korridoret më të rëndësishme lidhëse të vendit.