Nuk zgjatet afati i votimit në Vlorë, opozita braktis mbledhjen

Mbledhja e Komisionit Rregullator në KQZ ka dështuar për shkak të mungesës së kuorumit, duke pamundësuar shqyrtimin e një propozimi të rëndësishëm për vijimin jashtë orarit zyrtar të procesit zgjedhor në Qarkun Vlorë.

Në fokus të mbledhjes ishte shqyrtimi i kërkesës për zgjatjen e afatit të votimit në 55 qendra votimi në këtë qark, për shkak të kufizimeve në lëvizje të shkaktuara nga aktiviteti ndërkombëtar sportiv “Giro D’Italia”. Por mungesa e dy anëtarëve të opozitës, të cilët bojkotuan seancën, çoi në mosarritjen e kuorumit të nevojshëm për zhvillimin e saj.

Pa prezencën e këtyre anëtarëve, Komisioni nuk mundi të marrë në shqyrtim propozimin, duke rrezikuar përfshirjen e plotë të qytetarëve në procesin e votimit në zonat e prekura nga aktiviteti sportiv. KQZ nuk ka bërë ende të ditur nëse do të ketë një përpjekje të dytë për të thirrur mbledhjen, ndërsa qytetarët në zonat e prekura u bëjnë thirrje autoriteteve për zgjidhje të menjëhershme.