Oficeri i “Fast” shantazhon qytetarin, kolegët e prangosin (EMRI)

ELBASAN – Një oficer policie i identifikuar si Sokol Fana është vënë në pranga nga kolegët e tij mëngjesin e kësaj të premteje në Elbasan. Mësohet se Fana i bënte shantazh një qytetari që “kishte probleme me drejtësinë italiane”, që t’i jepte oficerit 7 mijë euro që ky të mos e arrestonte.

Qytetari K.H nuk iu dorëzua shantazhit, por verifikoi nëse ishte e vërtetë ajo me të cilën e kërcënonte oficeri dhe doli se nuk ishte i kërkuar nga drejtësia e asnjë shteti.

Si rrjedhim, njoftoi Policinë e cila me një operacion blic i vuri prangat kolegut të saj.

Sokol Fana e kishte mashtruar shtetasin K.H duke i thënë se nëse donte që të mos arrestohej nga njësia e tij “Fast” për llogari të drejtësisë italiane, duhet t’i paguante Fanës, 7 mijë euro.

Arrestimi i oficerit është kryer në orët e para të kësaj të premteje, pasi shtetasi K.H kishte verifikuar se nuk ishte aspak në kërkim, ndaj ka njoftuar Policinë e cila e ka arrestuar në flagrancë.