“Paqja fiskale”/ Qeveria fal të pasurit, qytetarët paguajnë faturën!

Ligji i ri i buxhetit ka futur një “paqë fiskale” që preket mbi 202 mijë qytetarë, por që në realitet shërben si mbulesë për shlyerjen e borxheve të mëdha të rreth 200 kompanive të fuqishme, të lidhura me pushtetin. Shuma totale e falur mbetet sekret shtetëror, ndërkohë që qytetarët e thjeshtë mbajnë barrën e kostos.

Në listë përfshihen tatime, dogana, kamatëvonesa, fatura energjie, uji dhe tarifa mjedisore. Ndërkohë, biznesmenë të profilit të lartë si Luan Bregasi, i hetuar për falsifikim dhe mos-pagesa të sigurimeve, përfitojnë miliona euro, ndërsa qytetari i thjeshtë penalizohet për vonesa të vogla.

Paqja fiskale në Shqipëri nuk ka transparencë dhe nuk kërkon asnjë përgjegjësi nga përfituesit, duke u kthyer në një amnisti masive për klientët politikë. Mazhoranca miratoi ligjin pa asnjë pengesë, ndërsa opozita heshti, duke mos ngritur alarmin për pasojat që sjell ky akt për qytetarët dhe ekonominë.

Qindra mijëra qytetarë shërbejnë si mbulesë për më shumë se 200 kompani të mëdha, ndërkohë që bizneset e vogla dhe personat juridikë janë të përjashtuar nga tatimet deri në vitin 2028. Futja e tyre në këtë amnisti nuk ka asnjë justifikim ligjor.

Qëllimi i fshehtë i “paqes fiskale” është fshirja e borxheve të mëdha të kompanive për 10 vite, duke përfshirë shuma të papaguara tatimore, komisione, borxhe doganore, kamatëvonesa, si dhe faturat për energji, ujë, gaz, mbeturina dhe tarifa mjedisore.

Një qytetar i thjeshtë, për arsye jetike, mund të gjobitet ose madje arrestohet për vonesa të vogla. Ndërkohë, bizneset e mëdha të lidhura me qeverinë mund të kryejnë shkelje të përsëritura dhe të falen pa pasoja.

Paqja fiskale përbën një shkelje të rëndë kushtetuese, pasi Kushtetuta e Shqipërisë parashikon se të gjithë qytetarët janë të barabartë para ligjit. Mos-pagesa e detyrimeve fiskale konsiderohet shkelje penale, ndërsa kjo kastë përfituesish është në konflikt interesi politik.

Rasti më i njohur është Luan Bregasi, nënkryetar i Këshillit Bashkiak të Tiranës dhe pronar i Birra Tirana. Bregasi është hetuar për falsifikim të bilanceve dhe mos-pagesa të sigurimeve shoqërore, duke krijuar barrë për punonjësit dhe për shtetin.

Paratë e falura nga qeveria janë para publike. Shteti nuk ka të drejtë t’i amnistojë këto shkelje përveçse me vendim gjykate, jo me akt të njëanshëm. Shumica e këtyre aseteve përfaqësojnë pasuri kombëtare dhe duhen mbrojtur nga abuzimet.

Një paqë fiskale e vërtetë në vendet e tjera bëhet pas transparencës së plotë, ku qytetarët informohen dhe përfituesit kontribuojnë për shoqërinë. Në Europë dhe SHBA, bizneset e mëdha paguajnë pjesën kryesore të kontributeve për punonjësit ose për projekte sociale, ndërsa në Shqipëri, mënyra e zbatuar nuk ka asnjë detyrim, vetëm falje e borxheve për një grup të zgjedhur biznesesh, me shumën e saktë të fshehur nga publiku.