Paralajmëron Rutte: NATO mund të sulmohet nga Rusia

Sekretari i përgjithshëm i NATO-s, Mark Rutte, paralajmëroi të enjten se Rusia mund të arrijë kapacitetet për të kërcënuar drejtpërdrejt aleancën brenda pesë vjetëve të ardhshëm, duke u bërë thirrje vendeve anëtare të rrisin investimet në mbrojtje.

Gjatë fjalimit në Konferencën e Sigurisë së Mynihut, të mbajtur në Berlin, Rutte tha se aleatët duhet të jenë realistë për rreziqet aktuale:
“Duhet të jemi shumë të qartë rreth kërcënimit. Ne jemi objektivi i radhës i Rusisë.”

Ai paralajmëroi se, me një ekonomi të orientuar drejt luftës, Moska mund të jetë në gjendje të përdorë forcën kundër NATO-s brenda pesë vitesh. Rutte theksoi se Rusia ka rritur ndjeshëm prodhimin ushtarak gjatë luftës në Ukrainë, duke prodhuar rreth 2,000 raketa kruiz dhe balistike gjatë këtij viti dhe afro 2,900 dronë sulmues çdo muaj.

Shefi i NATO-s akuzoi Moskën se po zhvillon një luftë hibride në rritje ndaj vendeve perëndimore, përfshirë fushata të fshehta, sabotim të infrastrukturës kritike, incidente ajrore dhe ndërhyrje me dronë.

“Përgjigja jonë ka qenë e qetë dhe proporcionale, por duhet të jemi gati për përshkallëzim të mëtejshëm,” theksoi Rutte. Ai rikujtoi rëndësinë e Nenit 5 të NATO-s, duke nënvizuar se çdo agresor duhet ta dijë që aleanca “mund dhe do të kundërpërgjigjet fort”.

Në një panel pas fjalimit, Rutte vlerësoi planin e Gjermanisë për të rritur shpenzimet e mbrojtjes, duke e cilësuar thelbësor për sigurinë e Evropës. Ai kritikoi zërat skeptikë brenda vendit, duke paralajmëruar se kërcënimi rus është real dhe nuk duhet nënvlerësuar.

“Nëse doni të flisni gjermanisht dhe jo rusisht, kjo është e domosdoshme,” u shpreh Rutte, duke theksuar se presidenti rus Vladimir Putin nuk do të ndalet vetëm me Ukrainën.