Pas akuzave për takimin e famshëm të “Arubas”, reagon Damian Gjiknuri

Damian Gjiknuri ka reaguar për herë të parë në mënyrë të drejtpërdrejtë ndaj deklaratave që kanë qarkulluar në media, ku aludohet për përfshirjen e tij në një takim të dyshuar me trafikantë në Aruba. Ai i mohon kategorikisht këto pretendime, duke theksuar se nuk ka qenë asnjëherë në atë vend dhe nuk ka pasur asnjë kontakt me personat e përmendur.

Në reagimin e tij publik, Gjiknuri i cilëson akuzat si tërësisht të pavërteta dhe shpifëse, ndërsa e konsideron avokatin Arben Llangozi, i cili ka përmendur emrin e tij, si përgjegjës për përhapjen e këtyre pretendimeve.

Sipas tij, për shkak të angazhimeve në funksione publike ndër vite, figura e tij ka kaluar nëpër procese të shumta verifikimi nga institucionet e drejtësisë, të cilat – sipas tij – kanë konfirmuar pastërtinë e tij.

Gjiknuri thekson se nuk ka pasur asnjëherë lidhje me individët për të cilët flitet në deklarata, ndërsa shton se këto akuza synojnë të dëmtojnë imazhin e tij publik. Ai paralajmëron se do të ndjekë rrugën ligjore ndaj çdo pretendimi të pabazuar.

Në vijim të reagimit, ai sfidon publikisht Arben Llangozin që të paraqesë prova konkrete për akuzat e ngritura. Në të kundërt, kërkon tërheqje publike të deklaratave dhe dorëheqje nga ushtrimi i profesionit të avokatit.

Njëkohësisht, Gjiknuri bën me dije se ka autorizuar përfaqësuesin e tij ligjor për të përgatitur një padi për shpifje, duke sinjalizuar se çështja do të ndiqet në rrugë gjyqësore.

Ai kujton gjithashtu se nuk është hera e parë që përballet me situata të ngjashme, duke përmendur raste të mëparshme ku, sipas tij, pretendime të ngjashme janë rrëzuar dhe autorët janë tërhequr nga proceset ligjore.

Në përfundim, Gjiknuri thekson se gjatë gjithë karrierës së tij ka refuzuar të përfshihet në presione apo tentativa për diskreditim, duke i cilësuar këto sulme si të qëllimshme dhe të motivuara.

Reagimi i Damian Gjiknuri:

Kam qenë gjithmonë i bindur se nuk ia vlen të humbet kohë duke iu përgjigjur çdo shpifësi ordiner që hedh baltë mbi emrin tim. Edhe ndaj deklaratave publike të shtetasit Arben Llangozi, i cili prezantohet si avokat, zgjodha të mos reagoj disa ditë më parë, duke besuar se ai do ta kuptonte shumë shpejt se kishte ngatërruar shënjestrën.

Pa e fshehur ama habinë time se si mediat riprodhojnë deklarata pa asnjë fakt nga një person i njohur publikisht dhe dënuar me vendim gjykate si mashtrues profesionist. Mashtrues që ka tërhequr dhe rekursin e tij në gjykatë duke pranuar dënimin.

Megjithatë, në rolin e një shpifësi ordiner me pagesë, ky person vazhdon edhe sot të përsërisë publikisht të njëjtat pretendime. Gjatë gjithë karrierës sime, si në sektorin privat ashtu edhe në jetën publike, kam refuzuar kategorikisht t’u nënshtrohem këtij lloji gjobëvënësish publikë, që paguhen për të sharë dhe shajnë për t’u paguar.

Në respekt ndaj opinionit publik, i cili helmohet nga deklarata të tilla shpifëse, deklaroj me përgjegjësi të plotë se nuk kam qenë asnjëherë në Aruba, nuk kam takuar asnjëherë e askund dhe nuk kam pasur asnjë lidhje me personat për të cilët aludon ky shpifës.

Për shkak të funksioneve që kam ushtruar në jetën publike dhe akuzave të vazhdueshme të ngritura ndaj meje, emri im i është nënshtruar verifikimeve më të imtësishme nga organet e posaçme të drejtësisë. Të gjitha këto procese kanë konfirmuar pastërtinë e figurës sime, ndërsa shpifësit janë detyruar të gëlltisin mbrapsht të pavërtetat e tyre.

E sfidoj publikisht Arben Llangozin të publikojë provat që mbështesin pretendimet e tij. Në të kundërt, ai duhet të tërhiqet publikisht nga këto deklarata dhe të dorëzojë licencën e avokatit.

Ndërkohë, kam autorizuar avokatin tim të përgatisë dokumentacionin e nevojshëm për ngritjen e padisë për shpifje ndaj Arben Llangozit.