Pasi e dhunoi, e hodhi ish-gruan nga kati i dytë

Një ngjarje e rëndë ka ndodhur ditën e djeshme në Fier ku një 47-vjeçar ka dhunuar ish-bashkëshorten e tij. Sipas informacioneve zyrtare të dhëna nga Policia e Fierit, mësohet se në pranga ka përfunduar 47-vjeçari me inicialet S. Rr.

Ky i fundit akuzohet se ka dhunuar dhe më pas ka hedhur nga kati i dytë ish-bashkëshorten e tij. Ngjarja e rëndë ndodhi në Patos, ndërsa dhunuesi është banues në fshatin Kurian të Roskovecit. Arrestimi i këtij shtetasi u bë pasi gjatë ditës së djeshme në Patos ka hyrë në shtëpinë e ish-bashkëshortes së tij pa pëlqimin e saj, e ka keqtrajtuar dhe e ka rrëzuar nga kati i dytë i banesës.

Po ashtu, bëhet e ditur se shtetasja E. S., 38 vjeçe, ishte e pajisur me urdhër mbrojtjeje nga Gjykata, ndërsa ndodhet në Spitalin Rajonal Fier nën kujdesin e mjekëve. Materialet i kaluan Prokurorisë pranë Gjykatës së Shkallës së Parë Fier për veprat penale “Vrasje për shkak të marrëdhënieve familjare” e mbetur në tentativë, “Dhunë në familje”, “Veprime në kundërshtim me vendimin e Gjykatës”, “Dhunimi i banesës” dhe “Shkatërrimi i pronës”. Sipas burimeve nga uniformat blu, ngjarja ka ndodhur në banesën e familjes së të dhunuarës.

Kjo e fundit prej kohësh ishte ndarë nga bashkëshorti dhe jetonte me të afërmit e saj. Arsyeja e ndarjes mësohet se ishte pikërisht dhuna fizike që 47-vjeçari ushtronte ndaj bashkëshortes së tij, por kjo gjë nuk ka ndaluar as pasi kanë shkëputur lidhjen e tyre. Gjatë dëshmisë në Polici, e dhunuara mësohet se është shprehur që ish-bashkëshorti e kërcënonte herë pas here se do ta rrihte.

Dhe kjo gjë nuk ka vonuar shumë. Vetëm një ditë më parë ai ka shkuar te banesa e ish-gruas dhe aty ka lindur fillimisht një konflikt verbal mes tyre, në agravim të konfliktit ai ka filluar ta godasë atë dhe ta hedhë më pas nga kati i dytë i banesës ku ajo qëndronte.

Gruaja ka marrë dëmtime serioze në trup, por fatmirësisht ndodhet jashtë rrezikut për jetën. 47-vjeçari është arrestuar nga Policia disa orë pas ngjarjes, ndërsa pritet të dalë para Gjykatës për t’u njohur me masën e sigurisë që do të vendoset ndaj tij. Ai mësohet se është shfaqur i penduar lidhur me ngjarjen, por ky fakt nuk mendohet se do të lehtësojë rrethanat ndaj tij.