Plagosi policin, Bozhanaj: Jam komandant i Pentagonit

Policia është në pritje të ekspertizës mjekoligjore të shëndetit mendor të 42-vjeçarit Klered Bozhanaj. Ky i fundit është arrestuar si autor i dyshuar në tentativë vrasje të policit Edlir Alleshi.

Marrja e tij në pyetje nga hetuesit, të premten, më 22 shtator, ka nxitur më shumë dyshimet rreth gjendjes së tij shëndetësore.

Deklaratat e tij para policisë janë bërë shkas për dyshimet e mëtejshme se Bozhanaj mund të vuajë nga probleme të rënda të shëndetit mendor.

Kur është pyetur për rrethanat dhe motivet e ngjarjes, ai është shprehur “Jam komandant i Pentagonit”, duke ngritur shqetësime të mëdha lidhur mbi gjendjen e tij psikike.

Ngjarja është raportuar në prokurori për tentativë-vrasje të punonjësit të policisë.

42-vjeçari u arrestua disa orë pasi qëlloi me armë punonjësin e forcave “Shqiponja”. Ai u arrestua teksa po dilte nga banesa e tij, e cila ndodhet në zonën e Kinostudios.

Një grup efektivësh që monitoronin banesën, kanë ndërhyrë menjëherë sapo Bozhanaj po përgatitej të dilte dhe ishte duke u veshur. Ai mbante një armë tip pistoletë me fishekë në gojë gati për të shtënë.